Chak phu zawk an chak - Mapuia

Mizoram Super League hi vawi 10 khelh a ni ta a, Zarkawt BCA chu vawi ruk champion tawhin, a hnaih bertu Khatla TBL hi vawi thum an champion - Mission Veng Vikings chu vawi khat an champion ve tawh bawk.

Khatlain nomawi pathum an chawi zinga pahnih hi MSL1 & 2-a an lak a ni a, H. Laldinsanga (Mapuia) chu coach-player a ni - nikum final-ah Khatla hian BCA hi an ngam lo tawh a, tun season-ah Zarkawt rorelna tihtawp tumin H. Laldinsanga (Mapuia) an thlem let.

Final game 3 an khelh hmain Mapuia'n, "Ka muttui loh phah lo," tiin an champion tur thu Vanglaini hrilh mah se, a tlawm zawkah an ṭang a, a vawi thum nana Khatla champion pui a tumna chu a tlawlh.

Mapuia chuan, "Ball kan hloh nasa lutuk a, ka naute an khel chhe thlawt. Pressure kan zo lo deuh em ni chu aw, ka ti hial. Tlarhnungah kan pherh ṭhin a, a nawr kawngah kan ṭha chuang bawk si lo. Champion phu zawk an champion a ni," tiin Vanglaini a hrilh.

India international hlui Mapuia chuan, "Khatla mipuiten min ṭawiawm ṭha ṭhin a, kan lawm takzet. Hei hi kan tawpna tur a ni lo. Kan lo kir leh ang a, Khatlaah MSL nomawi hi a kir leh ang," a ti!