Pathian vang liau liau a ni - Tetea

Zarkawt tlangval a ni a, an veng basketball boruak chhem nungtu a ni a, Zarkawt BCA leh Marc Lalthlamuana Sailo (Tetea) sawi rem hi thil inhmeh a ni - tun season-ah a vawi hnih nan head coach niin Zarkawt a enkawl a, season hnih a zawnin a champion pui ta.

Tetea chuan, "A hmasa berah chuan Pathian vang liau liau a ni. Khelmual ka pan dawn pawhin, 'Lalpa engmah kan ni lo, nangman min ṭanpui chuan kan chak ang,' ka ti a, Pathian rinawmna ka hmu a ni. Pathian hnenah lawmthu ka sawi a, min ṭawngṭaipuitu pawh tam tak an awm," tiin Vanglaini a hrilh.

BCA boss chuan sawi zawmin, "Player kim lo chungin inkhel kan hmachhawn a, mahse, kan team ṭhatzia pholanna remchang a ni ta a ni. Player ṭha dang awm lo mah se, player dang tan an chet ṭhat hun a inhawn phah.

"Player-te kan infuih nasa a, 'Zarkawt BCA kan ni a, kan tithei tur a ni,' kan ti. A hun takah Cunningham pawh a rawn che ṭha," a ti.

Tetea chuan, "Tun ṭuma kan champion hi ka tan chuan a special ber a, kan champion tawh zawng zawngah a ropui ber. Veng mipui chungah lawmthu ka sawi a, anni min ṭawiawmna leh thlawpna avanga tun dinhmun hi thleng kan ni," tiin Vanglaini a hrilh.