Saitual-ah AIFF D Certificate Coaching Course

MFA buatsaihin April 28, Thawhlehni aṭang khan AIFF D Certificate Coaching Course chu Saitualah neih ṭan a ni a, May 3, Inrinni thleng a awh ang. Course instructor hi Aizawl FC assistant coach R. Lalruatfela a ni a, instructor hna a chelh hmasak ber ṭum a ni.

Kolasib tlangval R-a hi Mission Veng pa Lalrindika'n a pui a, Dika hian he course zawh aṭang chuan D Licence Course-ah instructor hna a chelh thei tawh dawn. Saitual DFA-in course hi a thleng a; Lalmuanpuia, Saitual DFA Jt Secretary chuan co-ordinator hna a chelh.

Keifang Centenary Ground-ah course hi kalpui a ni a, Mizoram hmun hrang hrang aṭangin mi 25 thlanchhuah an ni. Chung zingah chuan Ricky Lallawmawma, Lalchhawnkima, Lalrinchhana Tochhawng leh Brandon VL Remdika te chu tualchhung football-a hriat lar an ni.

Coach nih tum 25 zingah hmeichhe pahnih F. Zohmingliana (Nutei) leh Marilene Hlychho te an tel. Nutei hi national referee niin Marilene hian Master of Physical Education (MPEd) a nei a, Siaha district aiawh niin Khopai khua a ni.