Inter player pawimawh Mkhitaryan

Manchester United leh Arsenal tan pawha khel tawh Henrikh Mkhitaryan hi Inter Milan tan player pawimawh a la ni a, kum 36 mi a ni tawh. Mkhitaryan hian Inter a zawm hian ram tan inkhelh a chawlhsan tawh a, kum 33 mi a ni tawh bawk.

Inter midfielder hi Armenian footballer zinga hlawhtling bera chhal ngam a ni a, football-a eizawng turin kum 2009 khan an sei lenna Pyunik a chhuahsan. Mkhitaryan hian Metalurh Donetsk, Shakhtar Donetsk, Borussia Dortmund, Manchester United, Arsenal leh Roma tan a khel tawh.

Man United tana a khelh laiin Europa League (2016-17) a chawi tawh a, Roma tana a khelh laiin Jose Mourinho hoin 2021-22 season khan Europa Conference League nomawi a chawi leh bawk. Inter hi Serie A-ah a champion pui tawh a, a hmachhawp chu UCL champion a ni.

Barcelona chungchang sawiin Mkhitaryan chuan, "Naupang leh theihna sang player awm khawmna a ni a, tawnhriat player tlemin an chawhpawlh bawk a, a harsa dawn. Semifinal-ah match hnih khel tur kan nei a, ṭha taka kan khelh chuan final kan lut thei ang," tiin a sawi.

Inter chet ṭhatna kawngah manager Simone Inzaghi a pawimawh a, Mkhitaryan chuan, "A bula thutak hun leh fiamthu thawh hun ka hria. A fing em em a, kawm a nuam a, khelmual chhung leh pawnah a invawng hle. Kum 36 mi ka ni tawh a, a uai thla lam ka ni tawh. Mahse, kan coach zarah ka theihna sang tak hi tun thlengin ka la lantir thei a ni," tiin manager a fak hle.