Man City-in FA Cup final an lut

Manchester City-in season hmang ṭha lo mah se Pep Guardiola hote tan nomawi dawn tur a la awm. Pathianni zan han FA Cup semifinal-ah City-in Nottingham Forest 2-0 in an hneh a, final an lut.

Man City hian FA Cup-ah a zawn zatin vawi thum final an lut a, Aston Villa hnehtu Crystal Palace nen final an khel ang. Nomawi inchuhna hi Wembley Stadium-ah May 17, 2025-a neih tur a ni.

A goal hma

Premier League table aṭanga teh chuan Nottingham leh Man City te an inhnehtawk dawn tih a hriat theih. City hian point 61 hmuin palina dinhmun an luah a, Nottingham Forest hi paruknaah awm mah se City aia match khata tlemin point 60 an hmu tawh thung. Khelh zat inangah Forest hi City chunga la awm thei an ni.

Pep Guardiola hote hi league-ah che ṭha lo mah se boruak sangah erawh an tawh a a khirh tlat. Wembley Stadium-a inkhelah pawh an insiamrem hma a, minute hnihna lekah Mateo Kovacic-a ball pek chu box pawn aṭangin Rico Lewis-a'n ṭha zetin a khung.

Goal an khung hma avangin City-in inrintawkna an ngah a, first half-ah inkhel an thunun hle. Mahse, goal an khung belh miau loh avangin Forest-in beiseina an la nei ve zel.

A hmuhnawm chiah

Halftime chawlh an hmang a, Forest manager Nuno Espírito Santo-a'n a player-te a fuih phur ṭha a, second half-ah an goal bawh a na sawt. Inkhelh ṭan chiahah Callum Hudson Odoi-a ball pek ṭha bik chu substitute Anthony Elanga-a'n khung thei lo.

City pawhin goal chance an insiam tho a, Kovacic-a ball pet-in Forest player kut per mah se penalty pek an ni lo. Pep-a hoten goal an khung tho a, minute 51-naah Omar Marmoush corner pet chu Josko Gvardiol-a'n a tauh lut.

Goal hnih an chhuah hnuah Forest ben harhin an awm a, City tlarhnung an tibuai hneh hle. Anthony cross chu Morgan Gibbs-White-a'n crossbar pet per nan a hmang.

Gibbs-White hian City goalkeeper Ederson an pass tur a chhuhsak hman a, goal ruakah khung loin goal ban a pet per a, Forest an vanduai. Bench aṭanga lut Taiwo Awoniyi pawhin goal ban a pet per a, mah se goal an khung thei tlat lo. Inkhel bul ṭan ṭha Man City 2-0 in an chak.

City an tho ta

Man City-in season ṭantirh match hmasa 13-ah hneh loh an tawng lo a, mahse hemi zawh hian match 13-ah vawi khat chiah an chak. Pep Guardiola hote an talbuai a, ruai ṭheh ni (boxing day) a Everton nen 1-1 a an inhnehtawk zawhah pasarihnaah an awm hial.

UCL-ah Real Madrid hneh loin quarterfinal an thleng zo lo a, Arsenal lakah 5-1 in an mualpho a, Forest ngei pawh hi March thla khan 1-0 in City Ground-ah an hneh lo. Tunah erawh City ṭha zawk kan hmu leh tawh a, match hnuhnung pasarihah awi ruk an hak.

Pep Guardiola chuan, "Liverpool aiin point tam takin kan hniam zawk a, Premier League-a kan chet dan aṭangin season hman ṭhat leh ṭhat loh hi teh a ni. Tun season-ah kan che ṭha lo a, chutihrualin kan chhiat belh zel loh nan theihtawp an chuah. Talbuai loa insiam ṭhat hi kan tum a ni," tiin FA Cup nomawi hmangin season duhawm lo tak chu an tih ziaawm theih thu a sawi.

Tun dinhmuna Man City hmachhawp chu season thara Champions League khelh leh FA Cup champion a ni a, Pep Guardiola hote hian an tih hlawhtlin ngei pawh a rinawm hle.