Hmasawna tur kan la nei - Enrique

Tlawm miah loin Ligue 1 nomawi an la fel tawh a, inelna lian Champions League semifinal lutin French Cup final an lut tawh bawk. Paris Saint Germain manager Luis Enrigue-a'n a la duhawk mai lo, hmasawn ngaihna lai an la nei tih a sawi.

PSG hian zanin dar 12:15 hian Ligue 1 match khel turin Nice an mikhual dawn, kar leh lamah UCL semifinal khel turin Arsenal an tlawh dawn a, inbuatsaihna hun an neih rei theih nan league match an khel hma.

UCL quarterfinal an khelh dawn ṭum pawh khan, kar tawpah PSG hi league match khel loa hahchawlh tir an lo ni tawh. Ligue 1 thuneitu lamin European football inelna liana an hlawhtlin theih nan an theih angin an pui tihna a ni.

Enrique chuan, "Match hautak khel tura inbuatsaihna ṭha ber chu a hma lama hnehna chan a ni a, boruak nuam leh hrisel tak hnuaia inkhelh a nuam, chutiang tur atan chuan Paris khawpui pawh a inpeih ka beisei," a ti.

Paris club hian an match hnuhnung berah Nantes chu 2-2 in an inhnehtawk pui a, inelna hrang hrangah khualmuala match an khelh hnuhnung 39 tehmeuhah an tlawm lo - European league lian pangah chuan record thar a ni hial.

Match 38 tlawm loa kal thei AC Milan record lo siam tawh chu an khum a, season duhawm an hman mek avangin chhunzawm zel pawh an tum ngei ang.

Enrique chuan, "Mi hrang hrangin min fak a, ṭhenkhat chuan an rilru tak tak an sawi laiin mahni rilru ni lem lo sawi pawh an awm thei ang. A pawimawh zawk chu eng ang taka ṭha nge kan nih hi a ni zawk.

"Ngun takin kan inkhel hi ka zirchiang ṭhin a, hmasawn ngaihna lai kan la ngah. Kan ṭhat tawk lohna lai kan siamṭha zel ang a, team puitling leh ṭha zawkah kan chhuak thei ang," a ti.