Parma mualah Juve an tlawm

Inkhelh hmain Juventus coach Igor Tudor chuan Parma hmachhawn an hautak tur thu a sawi a, an rinlawk ang ngeiin a awlsam lo - khualmualah Old Lady hi 1-0 in an tlawm.

Nilaini zan inkhelah Parma tan forward Mateo Pellegrino chuan chawlhlawk hma hretin goal awmchhun a khung a, mikhual team lamin Dusan Vlahovic leh Randal Kolo Muani te hmang mah se goal an khung ve thei lo.

Turin club hian ball an chang tamin inkhel pawh an thunun, mahse hun ṭha bera ngaih hmutu Serbian striker Vlahovic chuan goal ban hrulah a pet chhuak a, hliam vangin thlak a ngai zui a ni.

Serie A pangana ni lai Juventus coach Tudor chuan, "Tun ṭumah kha chuan engkim mai kha a dik famkim thei lo. Mawi leh ṭha tak taka tih chu nei ve ṭhin mah ila a tawp kan thleng thei ngai lo.

"League match khelh hmabak panga kan la nei, hengah te hi chuan ṭha lehzual zawka kan khelh a ngai tawh dawn. Kan chak lohna te theihnghilhin tunah chuan kan hmabak kan en a pawimawh zawk," a ti.

Juventus hian Pathianni zanah table mawngphah luahtu Monza an mikhual dawn a, insiamṭhat theihna remchang a ni ang.