Inter hnehin Milan an tlang

Luka Jovic-a goal hnih hmangin AC Milan chuan Inter Milan chu 3-0 in an hneh a, an phu ang ngeiin Coppa Italia final an lut - an intawn hmasakah 1-1 in an lo inhnehtawk tawh, belhkhawmah Milan hi 4-1 in an chak.

AC Milan hian Bologna leh Empoli inkhel a chak zawk an hmachhawn leh ang, semifinal first leg-ah Bologna hian si thum faiin hma an hruai fal tawh a, an chak tlang ngei pawh a rinawm a ni.

Inter Milan leh AC Milan te hian khelmual an inṭawm a, tun ṭumah hian Inter hi mual neitu zawk an ni; ticket an chang tam a, a hmunah entu an ngah thei zawk, khelmual ngai reng ni mah se stadium chhung boruak a inang lo.

Simone Inzaghi-a'n champion a duh, a player ṭha te a luhtir. Mahse, AC Milan chu team ṭha leh hlauhawm zawk an ni - chawlhlawk hmain Luka Jovic chuan a tauhlut a, a hnuah a tlawh lut zui leh bawk.

Goal khung an tum luatah Inter Milan tlarhnung a phui lo, hun tawp hma deuhin Tijjani Reijnders chuan chak a nemnghet a, tun season atana nomawi pakhat tal chawi an beiseina chu an chhawm nung.

Milan head coach Sergio Conceicao chuan, "A tir lamah kha chuan duhthusam ang takin kan khel thei bik lo, mahse vannei thlak takin goal kan khung a, a hnu lam kha chu a awlsam phah ta hle.

"Tlarhma lam an hriam ṭha em em a, goal khung theihna remchang an hmuh kha chuan an hlah lo. Chutiang bawkin a hnung lamin an hna an tlin takzet bawk a ni," tiin a sawi.

Inter Milan tan erawh nomawi chawi an beisei zinga pakhat chu a thamral ta phawt. Serie A hmahruaitu an la ni mek a, inelna lian Champions League semifinal an lut tawh bawk, nomawi pahnih pawh hi chiangsa tia sawi theih a la ni lo.

Inzaghi chuan, "Min ṭan tute lunghnur taka awmtir hi hrehawm kan ti ṭhin. Tun ṭumah pawh khan theihtawp chhuah mah ila vanduai chang a awm ṭhin si. Milan khan chak an phu a, kan lamwpui thiam a ngai," a ti.