Champhai kan 'bye bye' ta!

Mizoram Super League-ah Champhai Basketball Club kan hmu tawh dawn lo - Nilaini zan khan relegation playoff final game 2-ah Saron Veng BC chuan 94-90 in Champhai an hneh a, game 1-ah an lo hneh tawh bawk avangin 2-0 in an chak a, Champhai chu an puanthuah an teltir.

Champhaiin MSL mangṭha bik mai duh loin theihtawp an chhuah a, quarter li an khelh chhunga chak an awm loh avangin overtime khelh a ngai hial - a tawpah chuan team ṭha zawk Saron Veng BC an chak a, MSL an khelh chhunzawm dawn.

R. Dengṭhuama Indoor Stadium-a inkhelah Champhai tan Dee Franklin chuan point 36 ngawt score-in, rebound vawi 11 a la a, Lalropuia'n point 20 a score bawk.

Mahse, Saron Veng tan Frederick Elombi chuan point 22 a neih bakah rebound 19 ngawt a la a, T. Lalhriatzela'n point 24 neiin a rawn pui ṭha bawk - a tawpah chuan a chak zawkah an ṭang a, season thar atan MSL ticket an nei leh ta.

Champhai BC an tlak ve leh tak avangin MSL aṭanga club tla pathum a chiang ta a, Aizawl khaw pawn aṭanga MSL club nei awmchhun Champhai kan thlah hma hian Bungkawn LB Associates leh Electric Veng BC te chu kan lo thlah tawh.

MSL X-ah hian Electric BC, Saron Veng BC leh Zemabawk BC te chu kai thar an ni a, Electric an tla lehnghal a, Saron leh Zemabawk erawh an cham chhunzawm dawn ta a ni.