TNT bul ṭanna tur chu Tuichangral

EverHome Pro Volleyball League 2025 inkhelh dan tur pawh fel a ni a, team ṭha Thutak Nunpuitu Team (TNT) chuan an match hmasa berah Tuichangral an hmachawn ang.

Inelna hi April 29, Thawhlehni zan dar 8:00 hian LPS Arena, Falkland-ah ṭan a ni dawn. Nilaini tlaiah Mizoram Volleyball Association president Dr Lalmalsawma Nghaka chuan fixture hi a tlangzarh a ni.

Season kal mekah Pro Division inelna tum hnihbuatsaih a ni tawh, a hmasa zawk Invitation Cup-ah Tuichangral an champion a, thla liam ta khan MVA Cup-ah TNT an champion ve thung.

Mipa team paruk an inel dawn a, zan hnihnaah champion lai Hunthar leh Khawbel an inkhel ang a, May 1, Ningani zanah Pro Volleyball-a champion hmasa ber Anastasia Electric Veng leh Sihphir inkhelin league round hmasa ber a zo ang.

Hmeichhe team pathum an inel dawn bawk. May 13-ah league ṭanin a zawna vawi thum champion tumin Lungmualin bul an ṭan dawn a, Bungkawn nen an inkhel ang. May 15-ah team thar Jimmy Kanan an inlan ve thung dawn a, Bungkawn nen an inkhel dawn a ni.

May 17-ah mipa league khel zo in May 19-ah hmeichhe league khelh zawh a ni ve thung ang. May 20 leh 21-ah mipa semifinal neih a ni ang a, May 23-ah hmeichhia final-in May 24-ah mipa final hmangin EverHome Pro Volleyball League hmawrbawk a ni dawn a ni.