Half Marathon 2025 - Ni khat chiah a awm ta

Aizawl International Half Marathon 2025 (AIHM2025) chu naktuk (April 26, Inrinni) zingah tlan tur a ni. Zing dar 5:30-ah RG Stadium thlen hman tur a ni a. Warm-up hi zing dar 6:00-ah neih a ni ang a, intlansiak hi zing dar 6:30-ah ṭan a ni ang.

AIHM2025-a tel duh tan vawiin thleng Lammualah inziahluh theih a ni. Half Marathon-a tlan tur inziaklut tawh tan vawiin chhun dar 10:00 aṭanga zan dar 6:00 inkar hian Lammualah intlansiaknaa hak tur bib lak tur a ni ang.

Inelna hi hi category pali half marathon (21.1 km), open race (10 km), fun race (5 km) leh junior category (5 km)-ah te ṭhen a ni. Inziahluh man hi tualchhung mite tan Rs 799 a ni a, naupang tan Rs 99 chauh niin ram pawn mite tan USD 30 a ni thung. Lawmmanah nuai 10 sem ral a ni dawn a, hriatchian duh nei tan 9863081655-ah zawhfiah theih a ni.

Mizoram sports minister Lalnghinglova Hmar chuan half marathon hmangin Mizo zingah hriselna ngaih pawimawhna tuh an tum thu a sawi a, inelna hi kum tina neih chhoh tur niin a hlawhtlin chhoh dan a zira international marathon thlenga buatsaih an tum thu a sawi.

Inelna buatsaihtu Mizoram Sorkar, Innovation India leh Athletic Federation of India ṭangkawpin half marathon hlawhtling taka buatsaih theih nan theihtawp an chhuah a, a tihlawhtling theitu erawh Mizo mipui an ni.