Lianzuala a ropui leh ta

A thawm a reh vang vang hnuah Lallianzuala Chhangte chanchin hriat tur a awm leh ta - Mumbai City forward hian Nilaini zan khan Indian Super Cup-ah goal hnih khungin, assist vawi khat a nei bawk a, Chennaiyin lakah Mumbai City chu 4-0 in a chakpui.

Mumbai tan Nikolaos Karelis chuan minute 43-naah goal hmahruai a khung a, goal dang lut loa chawlhlawk an hman hnuah Lianzuala a inlar - Lunglei tlangval hian minute 64-naah Jorge Ortiz-a siamsak chu a tlawh lut.

Lianzuala'n a duhtawk mai lo. Hun tawp nan minute li chiah a awm tawh tihah ṭha zetin ball a la lut a, a class pholangin goal mawi bik a khung - minute 90-naa Bipin Singh-a khung tur a siamsak pawh player class bik ke aṭanga chhuak awm renga mawi a ni.

Mumbai tan Lianzuala bakah Hmingthanmawia Ralte chuan inkhel bul a ṭan a, Chennaiyin tan PC Laldinpuia'n inkhel bul ṭanin, Lalrinliana Hnamte chu bench aṭangin a lut bawk.

Nilaini zan inkhel hmasa zawkah beisei loh result kan hmu bawk a, I League club Inter Kashi chuan ISL finalist Bengaluru chu an pet chhuak - hun pangngaiah team pahnih hi 1-1 in an inhnehtawk a, penalty-ah 5-3 in Inter Kashi an chak zui.

Bengaluru hian Ryan Williams-a goal chu an chakpui mai dawn niin a lang hman tawh a, mahse, Matija Babovic chuan minute 87-naah si phurh a sut - goal dang a luh loh avangin penalty hmangin chak zawk zawn a ni a, Inter Kashi an chak.

Bangalore club tan Lalremtluana Fanai chuan inkhel bul ṭanin, Inter Kashi tan Edmund Lalrindika'n bul a ṭan bawk.