Ethan Nwaneri a inringtawk

Arsenal rawlthar Ethan Nwaneri chuan goal khung mai bakah a ṭhiante khung tur siamsak turin a inpeih tih a sawi - Gunners hian zanin dar 12:30 hian Premier League khel turin Crystal Palace an mikhual ang.

Mikel Arteta naute hi an chak lo a nih chuan Liverpool chu match an khelh leh hmain an champion dawn, mi dang champion tir ngawt aia chuan an theih anga rei chelh turin chak ngei an tumin a rinawm.

Ipswich Town an hneh ṭumin Bukayo Saka a inhliam a, amah thlaktu Nwaneri chuan goal a khung zui. Kum 18 mi Nwaneri hian season kal lai inelna hrang hrangah goal kua a khung tawh.

Saka inhliam laiin Nwaneri hian a hmun a luah ṭhin a, kum dang zawng aiin match pawh a khel tam. Zaninah pawh damkawr Saka ai chuan coach Arteta-a'n Nwaneri hi a khelh tir zawk pawh a rinawm.

Hale End chhuak Nwaneri chuan, "Tun season ka hman danah ka lawm, khelmual chhunga luh hi nuam ka tiin goal khung phei chu a nuam lehzual, ka tan chuan hun nuam tak a ni mek.

"Goal khung mai bakah ṭhiante khung tur siamsak pawh a nuam ka ti, chumi tur chuan ka inringtawk tawh hle bawk a ni," tiin a sawi a, zaninah pawh mi enbik a nih leh ngei a rinawm.

Ethan bakah hian Myles Lewis-Skelly chu academy chhuak zinga rinrawl ni chho mek a ni bawk a, anni pahnih bakah hian an league match hnuhnungah chuan Nathan Butler-Oyedeji chuan bench aṭanga a EPL match hmasa ber a khel bawk.

Arteta-a'n Premier League nomawi a beisei tawh lo a, chuvangin zaninah a player ṭha ṭhenkhat chu a hahchawlh tir a rinawm. April 29, Thawhlehni zanah Champions League semifinal first leg khel turin Paris Saint Germain an mikhual zui dawn a ni.

Gunners hian zanin bak chu kar tawpah match khelh tur an nei dawn lo. European football inelna sang ber hmachhawn turin inbuatsaihna hun thawl an nei thei dawn tihna a ni a, hman ṭangkai ngei pawh an tum ang.