Barcelona Open-ah Alcaraz che fuh

French Open inbuatsaihna zinga mi Barcelona Open khelh mek a ni a, tunlaia khel ṭha thei tak Carlos Alcaraz chuan Ethan Quinn chu 6-2, 7-6 (8/6) a hnehin last 16 a inhlangkai.

Kar hmasa khan Alcaraz hian Monte Carlo Masters title a lo la tawh bawk a, tun ṭumah pawh hian champion tura rinkai a ni leh dawn, clay court a nih avangin atan hmun ṭha a ni bawk.

Kum 21 mi Alcaraz hian Barcelona Open nomawi hi kum 2022 leh 2023 khan a lo chawi tawh bawk, nikum khan hliam vangin a inkhel thei lo thung, kuminah a kaltluang leh mek. A match lehpekah chuan Laslo Djere a hmachhawn leh ang.

Spanish tlangval Alcaraz chuan, "Nikuma ka inkhel thei lo kha hrehawm ka ti hle a, a khawhar thlak hle bawk. Kuminah ṭha takin ka khel leh thei ta, tihsual chu nei nual mah ila ka siamṭha zel ang," tiin a sawi.

Alcaraz hian ni dang angin a service ṭha tawk lo, mahse a khingpui in break point vawi nga a hmuh chu a inchhanhim thei vek a, clay court inelna lian a nih bakah nomawi chawi chaka tuihal a nih avangin a inkhel a hmuhnawm ṭhin hle.

Inkhel dangah champion lai Casper Ruud pawh a chak, Ruud hian a khingpui Daniel Elahi Galan chu 6-4, 6-3 a hnehin last 16 a lut. World number 10 hian season kal laia a nomawi hmasa ber tur a beisei mek a ni.