Aizawl International Half Marathon; I hriselna hun fiahna hun ṭha a inhawng e
Aizawl International Half Marathon (AIHM) chu Mizoram sorkar, Innovation India leh Athletic Federation of India ṭangkawpin April 26, Inrinni hian RG Stadium, Aizawlah an buatsaih dawn.
Half marathon hi RG Stadium, Mualpui aṭangin tlan chhuah ṭan a ni ang a, RG Stadium-ah pawh tlan luh leh tur a ni ang. Inelna ṭan nan ni 14 hun a la awm e.
A thui zawng
Half marathon hi 21.1 km a ni a, hei hi inelna pui ber tur a ni. Mi nawlpui tana tlan theih tur 'open race' siam a ni a, 10 km a ni dawn. Nuam tia tlan duh tan pawh 'fun race' 5 km tlan tur a awm a, kum naupang zawkte inelna tur junior race 5km a awm bawk dawn.
Category pathum half marathon, open race leh fun race-ah hian inelna hi mipa leh hmeichhiain lawmman siam vek a ni a, a ti ṭha panga tan lawmman a awm dawn. Junior race-ah erawh mipa leh hmeichhia an inel kawp ang.
Hriselna a tan
Mizo mipuiin hriselna an ngai hlu chho a, damloa inenkawl man san zia an hriat bakah hrisel nawmzia an hriat avangin infiammi ni kher lo pawh taksa insawizawi ṭhin pawh an ṭhahnem ta hle.
Tun hi taksa dinhmun hriatna hun ṭha a ni a, tu tan pawh tel theih a ni. Hei bakah hian marathon hi discipline hrang hrang dinhmun hriatna ṭha tak a ni thei bawk. Marathon tlan ṭhang hrim hrim tan lawmman dawn theihna kawng a inhawng zau a, chutihrualin boxer, footballer leh infiamna hrang hrangah hian fitness nei ṭha an intla zep tih hriat a ṭha.
Registration man
Marathon inelnaah lian thamah reng reng chuan a thlawn tawpin a tlan ngai lo a, registration fee a awm ṭhin. Tun ṭuma tlan tur Aizawl International Half Marathon-ah pawh hian registration fee a awm a, India rama cheng tan Rs 799 niin foreigner tan US Dollar 30 (Rs 2581.12) a ni thung.
Mizoram chhunga interational half marathon hmasa ber tur a nih avangin Mizo mipui tan mellung pawimawh a ni a, hetiang hun bika tel hi kum khaw sawi a tlin avangin ngaih hlut thiam a ṭul hle.
Nuai 10 dawn theih
Half marathon (21.1k) tlan zinga darkar thum chhunga thleng hman zawng zawngin finisher medal an dawng dawn. Tlan thleng zawng zawngin 'timing certificate' chu marathon website (aihm2025.com) aṭangin ni 21 chhungin an download thei ang.
Sum fai pawhin lawmman a ṭha a, nuai 10 sem ral a ni dawn. Half marathon-a mipa leh hmeichhiaa pakhatnain cheng nuai 1.25 ve ve an dawng dawn a, mimala hui vek tur a nih avangin a tam tham hle. Pangana thleng tan sum faia dawn tur a awm tih hriat a ṭha bawk.