Liverpool tan Salah a rinawm

Trent Alexander-Arnold lo kiang rawh le, Mohamed Salah a cham dawn e - Liverpool forward ṭha mi Salah chuan Anfield-a cham chhunzawm zel turin contract thar a ziak ta a, kum hnih dang jersey sen ha chungin a la inlan dawn.

Kum 32 mi Salah chuan, "He hmunah hian kum riat ka khel tawh a, beiseina nen kum 10 khel turin ka inbuatsaih ta. Anfield-ah hian nuam ti takin ka inkhel a, ka career-a ka hun duhawm ber ka tawnna hmun a ni," a ti a, a chhuak dawn lo.

Salah hian Reds tan inelna hrang hrangah match 393 khelin goal 243 ngawt a khungsak a, assist vawi 109 a nei bawk. Tun season-ah ringawt pawh match 45 khel tawhin goal 32 a khung a, assist vawi 22 a nei.

Kum 2017-a AS Roma aṭanga Liverpool zawmtu Salah chuan, "Team ṭha tak kan neih tawh avangin ka phur hle. A hma pawhin team ṭha tak kan lo nei tawh tho a, nomawi kan chawi chhunzawm theih ka beisei avangin contract thar hi ka ziak a ni," a ti.

Salah hian Liverpool a pan hnuah Champions League, Premier League, FA Cup, League Cup leh FIFA Club World Cup te a chawi tawh a, FA Community Shield leh UEFA Super Cup a nei tel bawk.

Tun season-ah pawh Liverpool hian EPL nomawi an chawi leh ngei dawn niin a lang a, Pathianni zan dar 6:30 hian league match-ah West Ham an mikhual ang - match sarih chiah khelh tur awm tawhah point 11-in an sang fal mek.

Khawthlang media ṭhenkhat chuan Salah hian a kar khat hlawh £350,000 ang bawk chu a la hlawh dawn niin an sawi a, Egyptian journalist Ismael Mahmoud chuan £400,000 vel a nih thu a sawi thung.

September khan Salah hian Liverpool-a a season hnuhnung ber a hman mek thu a sawi a, contract thar chungchangah dawr a la nih loh thu a sawi bawk. Thla hnih hnuah Salah hi ṭawng chhuak lehin, contract thar zawrh a ni lo chu a hriatthiam loh thu sawiin, "Ka chhuah a rinawm zawk," a ti.

January khan Salah hi ṭawng chhuak lehin, a contract thar tur chungchangah hmasawnna engmah a awm loh thu a sawi - tunah erawh contract thar a ziak ta a, Reds fan-te an thaw huai ang.

Salah hi kum 2023 khan Al-Ittihad chuan pound maktaduai 150-a lei tumin Reds an dawr a, Liverpool hian an hnar. Saudi Arabia sports minister Prince Abdulaziz bin Turki Al-Faisal chuan an rama inkhel tura Salah a duh thu a lo sawi tawh bawk a, anni beiseina erawh a thamral ta.

Hetihlai hian nipuia contract hmang zo mai tur, Liverpool captain Virgil van Dijk pawhin contract thar a ziak hnai tawh a, he thuziak i chhiar meuh chuan a ziak tawh hial mai thei - kum hnih atan tho a ni dawn bawk.

Liverpool academy chhuak, right back Trent Alexander-Arnold chungchangah erawh thu thar a awm rih lo a, England international hian Real Madrid a pan dawn nia sawi a ni.