Bengaluru kan huphurh lo - Apuia

Zanina mipui mit fukna tur chu Lalengmawia Ralte (Apuia) a ni leh dawn. Vaivakawn tlangval hian season hmasa khan Mumbai City chu ISL nomawi a lo chawipui tawh a, tun season-ah Mohun Bagan chu final a luhpui leh ta.

Apuia chuan, "Kan hmachhawn tur Bengaluru hi team ṭha tak an ni a, mahse, a huphurh ang zawng chuan kan huphurh miah lo. Kan khelmualah kan khel dawn a, fans kan ngah dawn avangin kan tan chuan 'advantage' ṭha tak ni nghalin ka hria," tiin Vanglaini a hrilh.

ISL final khelhna tur hmun hi a hranpaa ruat lawk a awm lo a, final-a inhmachhawn team aṭanga league table-a sang zawk khelmualah khelh tura tih a ni - Bagan-in ISL Shield an chawi miau avangin an khelmualah ISL final an khel dawn.

Semifinal-a goal hlu leh ropui khungtu Apuia chuan, "Goal khung lam ka ngaihtuah lo a, chuti lamah chuan rilru ka seng rih lo - champion hi ka beisei ber chu a ni mai," a ti a, season zawna champion a tumruh hle.

Apuia chuan, "Bengaluru hi an khelh danah ball an inpe kual zung zung a, crossing-ah an hlauhawm em em bawk," a ti a, Bangalore club ṭha dangchat turin Mizo midfielder ṭha Apuia a inbuatsaih mek e.