Bagan tum kan châk - Tluangtea

Bengaluru midfielder Lalremtluanga Fanai chuan Vanglaini hnenah Mohun Bagan hmachhawn an châk thu a sawi - kum 20 mi midfielder hian Kolkata mipui sing tel hmaah zam a tum lo hle.

Tluangtea chuan, "Bagan hi team ṭha tak an ni a, mahse, huphurh ang zawngin kan thlir hran lo - kan khelh châk ber an ni zawk mah ang," a ti a, Salt Lake Stadium-a Kolkata club hneh an châk thu a sawi.

Bawngkawn rawlthar chuan sawi zawmin, "Bagan hian a mimal ang chuan player an nei ṭha zawk mai thei. Mahse, a team ang chuan kan inthlau bik lo a, kan intluk tawk viau a ni," tiin Vanglaini a hrilh.

League round-ah Bagan leh Bengaluru hi vawi hnih an intawng a, Bengaluru hian an mualah 3-0 in hnehna an chang a, Kokata-ah 1-0 in an tlawm thung.

Kum 20 mi Lalremtluanga Fanai hian Mizo football ngainatu zingah hriat a la hlawk tawk lo mai thei. Tata Trusts hnuaia football zirna, Centre of Excellence (CoE) Aizawla din a nih khan an player zingah a tel. CoE tawp tawh mah se a rah a lang chho ṭan!

Tluangtea hi CoE a awm lai hian India Under-15 leh U16 a inlan tura koh a ni a, India squad-a a awm hnuah Bengaluru U18 zawmin, Bangalore club-ah player pawimawh a ni chho.

Bawngkawn rawlthar hian season hmasa khan ISL-a a season hmasa ber a khel a, match 10 inlan mah se, a minute zat hi minute 377 bak a ni lo.

Tun season-ah erawh ISL match 25 a khel a, hliam vanga a chawl zawk tih loh chu a inlan zel. Tluangtea chuan, "Tuna kan coach Gerard Zaragoza hian Bengaluru a enkawl hmain kan inkhel video a lo en lawk vek a, chuta ṭang chuan min lo duh ve tawh.

"Coach thar vangin chance ka nei chho. Min duhsak a, min ring bawk," a ti - Tluangtea hian Bengaluru-ah hian season tawp rualin a contract hmang zo tawh dawn mah se kum thum atan contract thar a ziak.