Chanmari elpui Sporting inlan hun

Vawiin tlai dar 3:00 hian Chanmari FC elpui Sporting Clube de Goa-in Imphal-ah Neroca an hmachhawn dawn. Goan club hian match thum khelh tur an la nei a, Neroca bakah FC Bengaluru United leh Sat Tirur te an hneh vek chuan Chanmari FC tan I League khel turin match khelh hmabak pahniha chak ve ve a ngai dawn. Mizo club hian April 19, Inrinni hian Diamond Harbour an mikhual ang a, match tawp berah Klasa an hmachhawn ang.

Chanmari hi RG Stadium-ah Sporting Clube de Goa nen an inhnehtawk a, khualmualah an hneh lo thung. Hei vang hian Goan club hi head to head-ah an ṭha zawk a, khelh hmabaka an chak vek chuan point 34 an hmuh theih avangin Mizo club tan la chetsual theih a ni.

Dipankur Sharma kaihhruai Chanmari hian point 30 an hmu mek a, match hniha an chak ve ve loh chuan point 34-in an tawp thei a, head to head-a Goan club an tluk loh avangin pathumnaa awm thei dinhmunah an ding. Chutihrualin Chanmari tan I League khelh bakah I League 2 champion theih dan a la awm a, chumi tur chuan Diamond Harbour an hneh a ngai - Kolkata club nena an inkhel tur hi final ang hiala ngaih theih a ni.