Club lian ho an chak zo lo
Kar tawp Serie A inkhelah AS Roma leh an mikhual Juventus te chu 1-1 in an inhnehtawk a, inkhel dangah Inter Milan leh AC Milan te pawh an khingpui lakah an chak zo lo, point khat ve veah an lungawi a ngai a ni.
Pathianni zan Serie A a hmuhnawm a, coach thar Igor Tudor hnuaiah Juventus inkhel a hmuhnawm. Stadio Olimpico-ah chawlhlawk hma hretin Manuel Locatelli chuan goal a khung a, dinhmun ṭha zawkah milkhual team chu a dinpui.
Mahse, second half tir lamah mual neitu lamin Eldor Shomurrodov-a hmangin an sut a, coach tawnhriat nei ṭha Claudio Ranieri enkawl AS Roma an ṭang tluan thei a, an phu ang ngeiin point an hlawh chhuak.
Juventus coach Igor Tudor chuan, "Corner leh freekick aṭanga ball kal hi ven theih tak mai a ni a, tun ṭumah kha chuan corner aṭanga ball kal kan tauh chhuah loh zawk avangin goal kan chhuah. Zir belh tur kan la ngah hle tihna a ni," tiin a sawi.
Old Lady hian mual sir lam aṭanga ball an cross luh hmangin goal an khung ve tho - Roma tlarhnung ten an pet chhuah ṭhat tawk loh dawngtu Manuel Locatelli chuan hla duh tak aṭangin a hlap lut.
Goal khungtu Locatelli chuan, "Juventus captain armband hrengtu nih chu mawhphurhna a sang a, ngaihtuah tur pawh a ti tam hle. Mahse, ṭhiante puihna ka dawng ṭha a, goal khungtu ka ni thei kha ka lawm, coach hian zalen taka khel turin player tin min fuih," tiin inkhelh nuam an tih thu a sawi.
Turin club hian season thara Champions League khelh phak ngei tumin an bei mek, an chunga awm palina Bologna nen an point a inzat a, mahse Old Lady hian match khatin an khel tam thung, Roma chu point 55 nen pasarihna an ni mek.
Roma manager Claudio Ranieri chuan, "A nihna tak sawi chuan tun ṭum kan inkhelah kha chuan tlawm loh hrim hrim kan tum a, kan tihlawhtling bawk. Goal kan phurh hnuah sut tumin kan bei a, kan set hnuah kha chuan chak kan tum leh ngam.
"Match zawng zawngah hnehna chan theih a ni lohzia ka hrechiang a, chuvangin tun ṭum atan chuan ka naute khelh danah ka lungawi tawk hle," tiin a sawi a, anni pawhin UCL ticket neih ngei tumin an bei zui bawk ang.