PVL khelh hun tur a chiang

Mizoram Volleyball Association (MVA) buatsaih, tualchhung volleyball inelna lian ber chu kumin April 29 aṭangin khelh ṭan a ni leh dawn, mipa leh hmeichhe inelna buatsaih tur niin ruahman dan chuan May 23-ah a hmawr bawk tur a ni ang.

LPS Arena, Falkland-ah mipa team ruk leh hmeichhe team thum an inel dawn a, zan dar 8 aṭang vekin inkhel vawi 22, mipa team 18 leh hmeichhia vawi li a awm dawn a ni.

Season kal mekah Pro Division inelna vawi hnih buatsaih a ni tawh a, Thutak Nunpuitu Team-in hma an sawn tih lantirin Tuichangral nen trophy pakhat ve ve an la. Hetih lai hian season tir aṭanga Pro Division mipa team paruk zinga tel Durtlang North leh Chhinga Veng Spikers-in harsatna an tawk a, Pro Division team an ni tlang thei lo.

March-ah khan Pro Division inelna MVA Cup, Lungleiah neih a ni a, Durtlang North leh Chhinga Veng an tel loh avangin Pro Volleyball an khel thei lo. An hmun ruak hnawh khah nan April 1-3 chhungin Tuikual Indoor Stadium, Aizawlah playoff buatsaih a ni a, team pathum inel zinga sang ber Anastasia Electric Veng leh pahnihna Hunthar an tling.

PVL 2025-ah hian mipa team inlan tur chu - TNT, Tuichangral, Khawbel, Sihphir, Anastasia Electric Veng leh Hunthar an ni dawn. Hmeichhe lamah team pathum Luangmual, Bungkawn leh Kolasib te an inlan thung dawn a ni.