Arnold leh Gomez chawl rih dawn

Premier League hmahruaitu Liverpool player, hliam vanga chawl mek Trent Alexander-Arnold leh Joe Gomez te an la rawn kir lawk thei dawn lo. Reds coach Arne Slot chuan, "Kar engemaw zat chu an la chawlh a ngai dawn," tiin a sawi.

Arnold hi Real Madrid pan tur anga sawi a ni mek a, Reds ṭantute chuan Conor Bradley chu English fullback thlak turin an hual mek - mahse, ani pawh a dinhmun a la chiang lo.

Slot chuan, "Pathianni zanah a inlan thei ang em, kan la sawi thei lo," a ti - Liverpool hian Pathianni zan dar 6:30-ah league match khel turin Fulham an lenchilh ang.

Bradley hi Cottagers lakah a la inlan thei lo a nih chuan midfielder Curtis Jones chu right back-ah khel leh tura beisei a ni a, Everton lakah khan Jones hi tlarhnungah khelin a ti chhe lo.

Hetihlai hian keeper Alisson dinhmun pawh a la chiang lo. Slot chuan, "Alisson-a hliam neihna hi a lu lamah a nih avangin fimkhur pui a ngai a, a ṭha thei ang bera inenkawl zel a mamawh rih phawt a ni," a ti a, Brazilian keeper an 'risk' ngam rih loh thu a sawi.

Liverpool hian Premier League table chung ber an luah mek a, an hnuai chiaha awm Arsenal aiin point 12 ngawtin an sang zawk mek - match riat chiah khelh tur a awm tawh a, champion chianga sawi ngam an ni tawh.