MSL-ah league round khel zo

Sharda University Mizoram Super League X league round chu khelh zawh a ni ta - Zarkawt BCA chuan inkhel hmuhnawm takah 89-86 in Zemabawk BC an hneh a, Nilaini zan inkhel dangah Bungkawn LB Associates chuan 95-82 in Electric BC an hneh bawk.

Thawhlehni zan khan Chanmari BC chakin, Saron BC an tlawm a, inkhel pahnih result avangin Nilaini zan inkhel awm hmain top four tur a chiang tawh. Mahse, table-a club dinhmunin fixtures tur a hril avangin, awmze nei lo erawh a ni lo.

Zarkawt BCA leh Zemabawk inkhelah club pahnih an inlehthal zak zak a, a tawpah chuan BCA an chungnung - BCA tan Marquis Cunningham chuan point 28 neiin, rebound 14 a la a, Lalrina Renthleiin point 26 zet a score bawk.

Zemabawk tan Kenneth J. Perkins Jr chuan point 45 ngawt score-in, rebound 22 la bawk mah se a team a chhanhim zo lo a, point 14 a score baka rebound 12 latu Nitish Beniwal chet ṭhatna pawhin awmzia a nei phak lo.

MSL table-ah palina niin Zemabawk-in league round an khar a, semifinal-ah Khatla TBL an hmachhawn dawn phah - Zarkawt BCA-in Chanmari BC an hmachhawn thung ang.

Nilaini zan inkhel hnuhnung zawkah beisei tur nei tawh lo pahnih an intawng a, Bungkawn an chungnung - Electric-in hneh nei miah loin MSL league round an mangṭha ta thung!

Bungkawn tan Justin Sylver chuan point 31 ngawt score-in, rebound 12 a la a, Lalruatkima'n point 18 score-in a pui ṭha viau bawk - Electric tan AS Sarath chuan point 25 neiin, rebound 11 a la a, Lalremruata (16) a che chhe lo bawk.

A tawpah erawh team chhanhim nan a tawk zo ta chuang lo a, a tlawm zawkah an ṭang. Electric-in table mawngphah an luah avangin relegation playoff-ah pangana Champhai BC an hmachhawn dawn a, Bungkawn hian Saron BC an hmachhawn dawn thung.