Inter leh Milan inhnehtawk

Coppa Italia final khel tur zawk sawi theih a la ni lo, semifinal first leg-ah AC Milan leh an mikhual Inter Milan te chu 1-1 in an inhnehtawk, second leg hi April 23-ah khelh leh a ni ang - Inter chu mualneitu an ni ve thung tawh ang.

Milan club pahnih ten khelmual an inṭawm a, mahse mualneitu chan chang lamin inkhel entu an ngah zawk ṭhin a, ticket an chang tam ṭhin tihna a ni - Nilaini zan pawh hi AC Milan lam chan a ni.

Chawlhlawk hnu lawkah Milan tan English striker Tammy Abraham chuan goal a khung a, mahse Inter tan an midfielder ball pet thia tak mai Hakan Calhanoglu chuan a sut, yard 25 zeta hla aṭangin a club hlui lakah hian a khung.

Tun season kal laiah Milan Derby bik vawi li ngawt kan hmu ta, Inter hian chak ni hmel an la hmu ve miah lo! Mahse, Serie A lamah erawh an hmelma club ai hian point 20 ngawtin an sang fal thei tho thung a ni.

Semifinal inkhel lehlamah Bologna chuan Empoli chu 3-0 in an lo hneh ve thung a, final lut turin an dinhmun a ṭha tawh hle a, an chak tlang a nih chuan AC Milan leh Inter Milan inkhela chak zawk nen nomawi an inchuh dawn a ni.