Mourinho-a'n a khingpui coach a khawih

Turkish Cup quarterfinal-ah Fernerbahce-in an hmelma Galatasaray an mikhual a, player hnawhchhuah pathum awmna inkhelah Jose Mourinho a tal ngap ber. Nilaini zan inkhelah hian Galatasaray 2-1 in an chak a, inkhel result aiin Mourinho chet danin sawi zui a hlawh ta zawk.

Sukru Saracoglu Stadium-ah inkhelh banah Mourinho leh Galatasaray manager Okan Buruk ten mual laiah refereee an be ve ve a, Portuguese manager hian Buruk hi panin a hnarah a piaisak. Galatasaray manager hi chhuatah tluin a kutin a hmai a dawm nghal.

Galatasaray vice president Metin Ozturk chuan, "Kan manager Okan leh Mourinho te khan referee chungah lawmthu an sawi ve ve a. Okan-a la ṭawng laiin Mourinho-a'n inhnialna a rawn ṭan a, kut a thawh zui bawk.

"Hetiang hi khawvel hmun dangah a ti thei ang em? Turkey hi eng chiahin nge min ngaih le? Fernerbahce hotute pawhin a phu tawk hremna an pek ngei ka beisei," tiin a sawi.

Kum 51 mi Buruk hian Galatasaray tana bul ṭanin Inter Milan leh Beskistas tana a khelh hnuin Galatasaray-ah bawk a kir a, Istanbul Basaksehir-ah player anga a hun tawp a hmang.

Buruk chuan, "Mourinho nena kan inkarah intih thiam lohna a awm lo. Chutihrualin khatiang hunah khan manager-te chu nungchang hre tura ngaih kan ni a, a chet dan kha a mawi lam hret a ni," tiin a sawi.

Turkish Super Lig-a team pahnih goal awm loa an inhnehtawk ṭum pawhin Turkish Football Federation chuan Mourinho hi an lo hrem tawh. Portuguse manager hi match li chhungin an hrem a, £35,194 an chawi tir bawk. Tun ṭuma a chet dan avang hian Mourinho hrem a ni leh ngei ang.