PSG hmachhawn tur Reims

French Cup final khel tur a chiang ta, team ṭha Paris Saint Germain hmachhawn turin Reims an inpet tling - nomawi inchuhna hi May 24-ah khelh a ni dawn, a dar zat tur tak erawh tih chian a la ni lo thung.

Nilaini zan khan Reims hian fouth division club Cannes chu 2-1 in an hneh a, kum 19 mi lek Nigeria winger Hafiz Ibrahim-a goal khung chu Cannes lamin Cheikh N’Doye hmangin sut mah se, goal khungtu Ibrahim bawk hian midfielder Teddy Teuma tana siamsakin an chak.

Semifinal inkhel hmasa zawkah PSG pawh an chak - Luis Enrique naute hian second division club Dunkerque lakah goal hnih an chhuah hmasa a, mahse a tawpah erawh 4-2 in an tho chhuak leh ta zawk a ni.

Ligue 1 champion ni mai tur PSG tan hian Ousmane Dembele chuan goal hnih a khung a, ani bakah hian Marquinhos leh Desire Doue ten goal khat ve ve an khung bawk a, mualpho thei dinhmunah ding hmasa mah se final an lut.

Paris club hian season hmasa ang bawkin France rama inelna lian pathumah champion an inbeisei mek a, an banphak maiah nomawi pathum a awm mek. Reims hian tun hmain French Cup nomawi hi vawi hnih an lo chawi tawh, mahse an hlawhtlin hun hi kum 1950 bawr daih tawh kha niin, final an luh hnuhnung ber pawh kum 1977 daih tawh kha a ni.