Foxes ngamtu Man City

Premier League champion lai Manchester City chuan season thara Champions League khelh phak ngei an la tum - Nilaini zan khan an mikhual Leicester City chu 2-0 in an hneh.

Pep Guardiola naute hian Etihad Stadium-ah goal an khung hma hle, striker Erling Haaland khel thei lo mah se minute hnihna lekah Jack Grealish chuan a khung a, a hnuah Omar Marmoush-a goal kan hmu bawk.

England international Grealish hian a goal khung chu a unaupa, kum 25 liam taa thi tawh Keelan tan a hlan. Chung lama ban phar chunga goal a lawm lai hi social media lamah a tarlang zui nghal bawk a ni.

Man City manager Guardiola chuan, "Jack hi chu mi ṭha tak a ni a, amah mai bakah an chhungkaw tana hun pawimawh takah goal a khung a, goal a khung bakah a ṭhiante tan ṭangkai taka a khel thei kha a lawmawm," tiin a sawi.

Guardiola naute hian match 30 an khelh aṭangin point 51 an hmu tawh a, nomawi an kawl lai hloh chiang tluk ni tawh mah se palina chinah tal awm ngheh an tum ang - khelh zat inangah pathumna Nottingham Foerst chu point rukin an phak lo.

Leicester City erawh an talbuai takzet - league match an khelh hnuhnung 15 zinga 14 tehmeuhah an tlawm; a hniam ber dawtah awmin a him chinga awm Wolves an phak lohna chu point 12 a nih tawh avangin season tharah EPL an khelh zui a rinawm loh a ni.