Bengaluru-in Goa an barakhaih

Indian Super League semifinal-ah Bengaluru chuan 2-0 in FC Goa an hneh a, second leg khelh tur a la awm avangin Goan club tan beisei bo vek erawh a la ni bik lo.

FC Goa-in league round-ah pahnihna an nih avangin semifinal an lut sa a, Bengaluru erawh playoff paltlang ngai an ni - Bangalore club hian semifinal kalkawngah 5-0 ngawta Mumbai City an sawp chungin Goa hian rin an hlawh zawk.

Mahse, Goan club beisei angin thil a kal lo. Minute 42-naah Bengaluru-in goal an khung a, striker chhuanvawr Edgar Mendez-a cross chu Sandesh Jhingan chuan tauhchhuah a tumna lamah, an lamah a tauh lut!

Chawlhlawk hman zui a ni a, Bengaluru bawkin goal an khung nawn. Minute 51-naah Edgar Mendez hun a inher chhuak a, Ryan Williams-a siamsak chu Granada forward hlui hian goal-ah a chantir.

Goan club beidawng thei an ni lo - second leg khelh tur a la awm avangin, goal khat lek rulh let hman pawh an tan a hlu tih an hria a, mahse, Manolo Marquez-a hote vanneih zan a ni lo.

Athletic Bilbao academy chhuak Odei Onaindia leh Boris Singh ten Goan club tan hun tawp lamah chance duhawm an nei a, mahse, an hun ṭha neih goal-ah an chantir thei lo a, an tlawm.

Goan club tan hian Ayush Chhetri chu bench aṭanga luhtir a ni a, hun tawp hnaih lamah Bengaluru tan Lalremtluanga Fanai a lut bawk. Ayush chuan, "A uiawm duh khawp mai - keini aiin an chance neih an chhawr ṭangkai zawk a, chu chu kan danglamna ni maiin ka hria.

"Kan home-ah kan comeback thei ang tih kan ring tlat a, kan comeback ngei pawh ka beisei," tiin Vanglaini a hrilh - Pathianni zan dar 7:30-ah Goa hian Bengaluru mikhualin, second leg an khel leh dawn.

Nizan khan ISL semifinal lehlamah Jamshedpur chuan Mohun Bagan an mikhual a, an result kan hre hman lo.