Inter leh Napoli an chak

Serie A champion lai Inter Milan leh an nomawi chuh mektu Napoli te chuan an khingpui ve ve an hneh a, Italian champion thar nih tuma inumna boruak chu a nung chho zel dawn.

Pathianni zan Serie A inkhelah Inter Milan chuan an mikhual Udinese 2-1 in an hneh a, an elpui an chak a ni tih hre sa chungin Antonio Conte naute chuan AC Milan 2-1 in an hneh ve bawk.

Diego Maradona Stadium-a inkhelah mualneitu Napoli tan Matteo Politano leh Romelu Lukaku ten chawlhlawk hmain goal an khung a, hun tawp dawna Luka Jovic-a goal khungin Milan tan awmzia a nei phak lo.

Conte-a'n hun tepter tawh takah Scott McTominay chu hliam vangin a chhawr thei lo a, a midfielder pawimawh tel loa inkhelh chu harsa a tih thu a sawi. Conte chuan, "Thil tum pawimawh tak tak kan nei nual.

"Serie A chauh a ni lo, a nihna takah chuan Champions League khel phak nih ringawt pawh lawmna tur a ni ang. Thla riat chhung rim takin kan thawkho tawh a, kan thlen chin hi lawmna tur a tam hle," a ti, an match lehpekah chuan Bologna an hmachhawn leh ang.

Milan manager Sergio Conceicao chuan, "Thla thum chhung deuh thaw chu duhthusam a training theihna hun kan nei lo a, mahse tun ṭum match atan chuan hun kan nei. Amaherawhchu, kan beisei ang result kan nei leh si lo.

"Inkhel tir lama goal kan chhuah nghal kha a pawi, a hnu lama thawh chhuah leh nghal a harsa tawh ṭhin a ni," a ti. Milan hi Serie A table-ah pakuana an ni mek, an tan European football a hla rih hle a ni.

Pathianni zan inkhel dangah Inter Milan tan Marko Arnautovic leh Davide Frattesi ten goal an khung, hun tawp dawnah mikhual Udinese tan Oumar Solet chuan goal khat a khung a, awmzia a nei phak tawh lo.

Hun tawp lamah inkhel boruak a sang a, hun tawp nan minute li chauh a awm tawh tihah Serie A champion lai Inter manager Simone Inzaghi chu match official a sawisel avangin hnawhchhuah a ngai hial.

Italian manager Inzaghi chuan, "Min hnawtchhuak kha chu a a dik, a chhan chu dan ka bawhchhia a ni. Mahse, thutlukna ṭhenkhat kha chu sawisel loh theih loh thil a ni," tiin a sawi a, a naute chhan a ti na hle.

Inter Milan hian league match 30 an khelh tawh aṭangin point 67 an hmu a, a chung berah an awm; anmahni hnaih bertu Napoli chuan point 64 an hmu thung a, an inthlauhna hi point thum chauh a la nih avangin match khat lekah an la in nihrual phak reng a ni.