Djokovic hnehin Jakub Mensik a champion
Miami Open khelh zawh a ni a, tawnhriat nei ṭha Novak Djokovic hnehin Jakub Mensik a champion - kum 19 mi Mensik tan a naupan lai aṭanga a ngaihsan em em hneh chunga nomawi chawi chu duhthusam a ni ngei ang.
Nimin zing Hard Rock Stadium-a inkhelah, seeded palina Djokovic hi chak tura rinkai zawk a ni. Mahse, rawlthar Mensik-a'n a ball vuak na leh service ṭha tak hmangin 7-6(4), 7-6(4) in a hneh a, world number 54 tan chuan final hriatreng tawh tur a ni ang.
Tennis a khelh china a title lian ber latu Mensik chuan, “Novak, ka naupan laiin i inkhel ka en ṭthin a, tennis ka khelh chhan pawh nangmah hi i ni. Final match bika nang hneh hi thil harsa a ni tih ka hria, chumi ka hlen chhuak ve mai chu ka tan pawh mumang ang mai a ni,” tiin lawmman an dawn hnuah Djokovic chungchang a sawi.
Jakub Mensik hian final kalkawngah seeded pathumna Taylor Fritz pawh a hneh. Mensik chuan, “He hmunah hian thil mak beisei in ka lo kal, tournament khelh hma lawk khan khup hliam vangin ka buai, vanneih thlak takin ka inkhel thei hram. Chumai bakah mak tak takin player ṭha leh rinkai zawk te ka hneh a, a tawpah nomawi ka chawi,” tiin a sawi.
Ruahman lawk dan chuan keini lama Pathianni zanlai khan final hi khelh tur a ni. Mahse, ruah sur vangin inkhelh hun sawn a ni a, nimin zing khan an khel zo chauh - stadium chhunga mipui ten Djokovic chu champion turin duhsakin ṭan viau man se an duh ang ngawtin thil a thleng thei bik lo.
Kum 37 mi a ni tawh a, Masters 1000 huanga final lut thei upa ber a ni hial. Champion se la chuan Jimmy Connors (109 title) leh Roger Federer (103 title) te huangah title 100 la tling thei a ni ang, mahse mellung hlu bik phun tur chuan a nghah leh rih a ngai dawn tihna a ni.
Grand Slam vawi 24 champion tawh Djokovic chuan, “Chak lo zawk nih hi chu a hrehawm a, pawm thiam a harsa bawk. Mahse, tun ṭum kan inkhel kha kan en erawh chuan Jakub Mensik kha chak phu zawk a ni a, hun pawimawh laiah a che fuh zawk a ni thei zel,” tiin a khingpui chu chak phu zawk a nih thu a sawi ve thung.