Saron par a vul leh ta

Match thum zet a zawna an chak hnuah Zemabawk BC an tlawm - a ngamtu chu Saron Veng BC an ni a, 97-82 a hnehna changin, league match ruk an khelha vawi thum an chakna chiah niin, top four-a league round khar beiseina a sang ve leh sawt.

Saron Veng tan T. Lalhriatzela a hmuhnawm thlawt a, point 33 ngawt a score! Cameroon tlangval Frederick Elombi chuan point 23 a score ve bawk a, Zemabawk tana Nitish Beniwal-a 'double-double' in awmzia a nei phak lo.

6ft 5in-a sang Nitish hian point 27 a score bakah, rebound 15 a la a, Lalrozama'n 28 point nei ve bawk mah se, Saron par vul zan an tawng a, an tlawm.

Bungkawn LB Associates an tlawm leh ta a, 83-71 in Chanmari BC an ngam lo. Zirtawpni zan inkhelah Bungkawn hi quarter khatnaah 23-9 in an hnufual a, quarter hnihna chu 23-9 vekin an la ve leh zui!

Mahse, quarter thumnaah 33-21 in an tlawm a, quarter linaah 18-18 ni zuiin, Chanmari lakah an tlawm. Bungkawn tan Justin Sylver chuan point 36 leh rebound lak 16 nei mah se, an thawnthu chu a ngai bawk a ni a, puitu a nei ṭha lo.

Chanmari tan Michael Liansanga a hmuhnawm thlawt a, point 35 a neih bakah rebound 10 zet a la - point 21 score a, rebound 19 latu Gregoryshon Magee a chet ṭhat bawk avangin Bungkawn tan Chanmari an u hret.

Hetihlai hian Khatla TBL an chak zel a, Inrinni zan khan Inrinni zan khan Electric BC chu 90-62 in an hneh - Khatla hi match ruk an khelhah an la chak vek a, Electric hi an la tlawm vek thung!

Khatla tan Emmanuel VL Awmpuia chet ṭhat chhunzawmin, point 22 a score a, Vanlalṭhazuala (16 point) pawh a che chhe lo.

Inrinni zan inkhel hnuhnung zawkah Zarkawt BCA an tal na a, Aizawl pawn aṭanga club inlan awmchhun Champhai BC chu 115-75 in an sawp - BCA tan Marquis Cunningham chuan point 27 a score bakah rebound 18 zet a la a, Zonunsanga (24 point) leh Lalrina Renthlei (21) an che ngap viau bawk.

Champhai tan Dee Franklin chuan 26 point neiin, rebound 12 a la a, Lalropuia (22) pawh a che ṭha - an team erawh an chhanhim zo ta lo.