Zemabawk leh Zarkawt an chak
Sharda University Mizoram Super League X-ah Zemabawk BC an kaltluang hle - match nga an khelha an vawi li chakna ni turin Electric Basketball Club chu 82-72 in an hneh a, MSL-ah kai thar ni mah se, champion an tum ngam tih an pholang.
Zemabawk hian match nga an khelh tawhah Khatla TBL chiah ngam loh an la nei a, hei pawh hi point hnih chauhin an ngam lo - Ningani zanah Zemabawk tan Vanlalrinchhana a langsar a, point 24 ngawt score-in, a team-in hnehna an chan theih nan a thawhhlawk hle.
Nitish Beniwal sawi hmaih a thiang lo - Delhi tlangval hian point 12 a score bakah rebound 13 zet a la a, hnehna an chan theih nan player langsar a ni.
Zemabawk hian quarter khatna chu 21-08 ngawtin an la nghal a, quarter hnihnaah Electric hian 20-13 in rawn la ve zuai mah se, Zemabawk an hnufual nawn tawh lo - 21-20 leh 27-24 in quarter hnih dang an la zui a, an chak.
Electric tan Zonunsanga'n point 25 score-in a hming a chher a, AS Sarath pawhin point 14 neiin, rebound 11 la mah se, player pahnih chet ṭhat hi an team chakpui nan a tling tawk lo.
Hetihlai hian Zarkawt BCA pawhin season bul ṭan fuh tawk lo mah se, an insiamṭha tawh tih an pholan chhunzawm a, Ningani zan inkhel hnuhnung zawkah Bungkawn LB Associates chu 100-71 in an hneh ve bawk.
Marquis Cunningham-a'n MSL nuam a ti tawlh tawlh a, Bungkawn lakah pawh point 29 ngawt a score - Lalnunpuia Renthlei pawhin a la rintlak reng tih pholangin, point 14 a nei a, Lalrina Renthlei (14 point) pawhin a la chuai lo tih a pholang nawn.
Bungkawn tan Justin Sylver bawk che ṭhain, point 21 a score bakah rebound 11 a la. Mahse, Bungkawn tan thawnthu a danglam thei lo a, an foreign player hian puitu a neih ṭhat tawk loh avangin an tlawm - match nga an khelh tawhah an la tlawm vek!
Tun season MSL-ah Bungkawn leh Electric te an la tlawm vek avangin MSL nomawi an beisei thei tawh lo - top four hnuai lamah an awm dawn chiang tihna a ni a, relegation battle an hmachhawn ang.
Zaninah inkhel pahnih a awm leh dawn. Tlai lam dar 5:30-ah Electric BC leh tlawm la nei lo Khatla TBL an inhmachhawn ang a, Zarkawt BCA leh Champhai BC te zan dar 8:30-ah an inkhel thung dawn a ni.