MotoGP leh Valencia GP inrem

Valencia khawpui chuan Circuit Ricardo Tormo tlankawngah, kum 2027 aṭanga kum 2031 chhung chu MotoGP Grand Prix a thleng chhunzawm dawn, inremna an nei fel tawh a ni.

Kum 1999 aṭang khan Valencia GP hi tlan a ni a, tuna inremna an neih sa hi kum 2026 thleng daih a ni - tunah chuan kum nga chhung atan inremna an siam belh.

MotoGP neitu Dorna Sports CEO Carmelo Ezpeleta chuan, "Tlankawng nuam leh mawi tak a ni a, a hmuna entute tan hmun him leh nuam a nih bakah mite ngainat a ni bawk.

"Tun hma ṭanga mite ngainat a nih avangin entu pawh an tam ṭhin, ticket hralh bang a awm ngai lo. Nikum khan MotoGP tlan mekna zinga panga chu hun rei zawk atan inremna kan neih pui tawh bawk a, tuna inremna kan nei leh thei hi a lawmawm," a ti.

Khawvela bike intlansiakna sang ber MotoGP hi kuminah inelna vawi 22 neih tura ruahman a ni a, intlansiak vawi hnih an nei tawh - a hnuhnung ber atan November 16 hian Valencian Grand Prix tlan a ni ang.