Josh Hart hoin Knicks an chak

Nimin zing NBA regular season inkhelah Josh Hart leh Karl-Anthony Towns te chuan triple double neiin an team New York Knicks chu Dallas Mavericks lakah 128-113 in hnehna an chanpui.

Madison Square Garden-a inkhelah Hart hian point 16 a neih bakah rebound ṭum 12 lain a ṭhiante basket neih tur vawi 11 a siamsak bawk a, season kal laiah triple-double vawi kua ngawt a nei tawh, a sulhnu hi New York Knicks tan record thar a ni hial.

Basketball inelna lian leh ngaihhlut huangah hian, match pakhatah team mal tana triple-double nei thei hi an la tam lo - Hart leh Towns te hi hetiang ti thei 17-na an ni a, an tan hun chhinchhiah tlak bik a ni ngei ang.

Mavericks tan hian Naji Marshall chuan point 38 a nei a, mahse second half bikah point 10 chauh a nei a, a team chakpui nan a tawk zo lo - a zawna vawi hnih an chak tawhna chu a tawp leh ta rih a ni.

Eastern Conference-ah Knicks hian match 45 hnehna an chang tling ta chiah a, pathumna niin playoff khel tuin an dinhmun a ṭha - a chak lo zawk Mavericks erawh Western Conference lamah 11-na an ni mek, a ṭha zual pariat zinga tel phak chu a harsa tawh dawn niin a lang.

Nimin zing inkhel dangah Golden State Warriors chu Miami Heat lakah 112-86 in an chak lo - Golden State hi season kal laiah vawi 31 ngawt an tlawm tawh a, playoff khel phak chinah awm mek mah se conference champion ni tur pawhin insiamṭhat an ngai nasa tih a lang chiang.