Kawng dik zawhtu Djokovic

Novak Djokovic chuan kum a hman ṭhat lohna siamṭhat ngei a tum a, kawng dik a zawh chho ve mek zel - Serbian star hian Lorenzo Musetti hnehin Miami Open khelh laiah quarterfinal a in hlangkai.

Nimin zing last 16 inkhelah seeded palina Djokovic hian 6-2, 6-2 in hnehna a chang a, Italian tlangval nen hian vawi 14 an intawh tawh aṭangin ṭum 12 ngawt hnehna a chang, vawiinah Sebastian Korda nen semifinal luh an inchuh leh ang.

Djokovic hian duhthusam veka ṭha chuan a khel bik lo, set khatna an khelh laiin service dawna hun an neih rei zawng chu chair umpire lakah a sawisel a, boruak zangkhai leh awlsam taka inkhel zo chu a ni bik lo a ni.

Kum 37 mi Djokovic hian vawi ruk ngawt mai Miami Open nomawi hi a chawi tawh a, kuminah pawh rinkai zinga mi a ni chho leh mek, a hmachhawn leh tur Korda hian inkhel dangah Gael Monfils chu 6-4, 2-6, 6-4 in a lo hneh ve bawk.

Grand Slam vawi 24 champion tawh Djokovic chuan, "Match tir lam kha chu a harsa khawp mai, inkhelh zawh hnua kan point awm dan nen kha chu khaikhin ngawt chi pawh a ni lo, a service ka chhuhsak hnuah erawh kawng a inhawng," tiin a sawi.

Mipa singles inkhel dangah Francisco Cerundolo pawh a chak - Argentine tlangval hian Norway mi Casper Ruud chu 6-4, 6-2 in a hneh.