Vawiinah Inter Dist junior semifinal

MFA Inter District Junior Boys Football C'ship semifinal chu vawiin hian Serchhip District Sport Complex-ah khelh a ni dawn. Chawhma dar 10:00-ah inelna thlengtu Lawngtlai DFA leh Serchhip DFA an inkhel ang a, chawhnu dar 1:00-ah Saitual DFA leh Mamit DFA te an inhmachhawn leh ang.

Semifinal khel tur team palite hi an intluk tawk hle. Group B aṭanga semifinal lut Saitual leh Serchhip te hi group match hnuhnung berah an inhnehtawk a, ṭha zawk tur hriatthiam an har. Group A lamah Lawngtlaiin Mamit hneh mah se Mamit hi player hnawhchhuah avangin kim loin an khel a, an intluk tawk viau turah a ngaih theih.

Inelna thlengtu Serchhip tlarhma player-te an ṭha a, an forward pathum Peter Lalbiakhlua, Lalṭhafamkima leh Lalpekhlua ten goal hnih ṭheuh khung tawhin midfielder Lalpeksanga pawhin goal hnih a khung tawh. Lawngtlai tlarhnung lamahin an ven uluk a ṭul ang.

Lawngtlai coach Lailianchhunga Chinzah chuan, "Kan team boruak hi a ṭha a, ka naute fighting spirit a ṭha bawk. Mimala innghahna kan nei lo," tiin Vanglaini a hrilh a, chutihrualin an forwad Joel Lalrinfela'n goal li a khung tawh tih hriat a ṭha.

Semifinal hnuhnung zawka inkhel tur Saitual leh Mamit hian football bikah Khelo India Centre an kalpui ve ve a, hei hi tun ṭuma an che ṭhatna chhan pakhat pawh a ni. Chutihrualin Khelo India Centre hi kum 17 hnuai lam a ni a, tun ṭum inelna hi Under 15 (kum 2010 leh 2011-a piang) a nih avangin academy hlang player chu an ni lo ve ve.

Saitual coach F. Vanlaltleipuia chuan, "Khelo India hi kan ṭhatpui khawp mai. Kan team hi Phullen aṭangin pahnih bakah Maite leh Ṭawizo aṭangin pakhat ve ve an rawn tel belh bawk a, kan inringtawk viau," tiin Vanglaini a hrilh. Attacking midfielder K. Lalchamzela chu game siamtu ber a ni a, David Vanlalṭhasiama'n goal thum khung tawhin tlarhmaah an pawimawh.

Chutihrualin Saitual hian group stage-ah goal khat chiah an la chhuah a, defender Malsawmdawngzuala (Dawng dawnga) leh keeper Martin Lalmalsawma te hnathawh hmuhmaih rual a ni lo. Mamit lamin mual vei lamah Joel Lahriatdika an nei a, ani hian goal ruk zet khung tawhin striker Laltlanhlua (Tetea) goal hnih a khung tawh bawk.

Mamit coach Lalchhandama chuan, "Saitual hi team ṭha tak an ni a, chutihrualin keini lam pawh kan inringtawk hle. Keini pawhin Khelo India football hi kan hlawkpui a, tun ṭum inelnaah hian a rahna a lang a ni," tiin Vanglaini a hrilh.