I League khel tur a hriat ṭan

I League 2-ah Chanmari FC elpui FC Bengaluru leh Sat Tirur te March 25, Thawhlehni khan goal awm loin an inhnehtawk a, team pahnih tan I League khelh a har dawn. Nimin tlai inkhelah United Sports Club-in Imphal an tlawh a, injury time-a goal an khung zarah Klasa 1-0 in an hneh hram. Kolkata club hi chak mah se season tawpa a sang pahniha tel tur chuan vanneih a ṭul ang.

Inelnaah hian team pakua an khel a, vawi hnih ṭheuh inkhel kualin match 16 ṭheuh an khel dawn. Hmahruaitu Diamond Harbour-in point 27 an hmu a, Chanmari FC-in point khat chauhin pha lo mah se Kolkata club hi match khatin an khel tlem. Chanmari hnuaia awm Sporting Clube de Goa-in point 19 an hmu a, Goan club pawh hi match khatin an khel tlem thung.

Mizo club elpui ber chu Sporting Clube de Goa an ni a, Goan club bak hi chuan buaina an siam thei tawh loah a ngaih theih. Sporting Clube de Goa hian United Sports Club, Trau, Neroca, FC Bengaluru leh Sat Tirur te an la hmachhawn dawn a, hnehna an chang vek a nih chuan point 34 hmu thei an la ni.

Goan club hi la hnawksak thei mah se dinhmun ṭha zawka ding erawh Chanmari an ni a, Mizo club hian FC Bengaluru, Sat Tirur, Diamond Harbour leh Klasa te an la hmachhawn dawn. Tling chiang turin Mizo club hian vawi thum chak an la mamawh a, chutihrualin Sporting Clube de Goa hi point hloh a nih chuan hei aiin a tlem daih theih bawk.