MSL boruak ngamtu Zemabawk BC
Sharda University Mizoram Super League X-ah kai thar Zemabawk BC an inthlahrung lo hle. Thawhlehni zan khan an intawn hmaa tlawm la nei lo Chanmari BC chu 85-79 in an hneh a, match li an khelha vawi thum an chakna a ni ta.
R. Dengṭhuama Indoor Stadium, Mualpuia inkhelah Zemabawk tan player chhuanvawr Kenneth J. Perkins Jr bawk a langsar a, 6ft 11in-a sang power forward hian vawi 34 zet a score bakah, vawi 15 ngawt rebound lak a nei a, a team tan a thawhhlawk hle.
Zemabawk tan Lalrozama pawhin point 14 neiin, rebound vawi 11 a la a, double-double nei ve bawkin, hnehna an chan theih nan player ṭangkai a ni.
Thawhlehni zan inkhelah hian team pahnih an inngam tawk a, boruak pawh a nung hle - Zemabawk hian first quarter chu 27-22 in la nghal mah se, quarter hnihnaah 21-21 in an inhnehtawk a, quarter thumnaah 13-17 in Zemabawk an hnufual zui.
Mahse, quarter linaah Zemabawk an insiamṭha a, 24-19 a lain, hnehna an chang zui - Chanmari tan Gregoryshon Magee chuan point 21 leh rebound vawi 13 la mah se, a team chakpui nan a tawk zo lo a, Lalnunsanga (27 point) leh Michael Liansanga (17) te chet ṭhat pawh chak loh uiawmna tizualtu mai a ni.
Vawiin tlai dar 5:30-ah Zemabawk BC hi an inlan chhunzawm dawn a, Electric BC an hmachhawn dawn - Chanmari hian nizan khan Khatla TBL an hmachhawn zui a, an result kan hre hman lo.
Thawhlehni zan inkhel hmasa zawkah Bungkawn LB Associates leh Saron Veng BC an intawng bawk a, tun season-ah a vawi li nan Bungkawn an tlawm leh tawh!
Bungkawn tan ṭum dang ang thoin Justin Sylver che ṭha fal nalh mah se a team chakpui nan a tawk zo lo - Bungkawn hian 84-94 in Saron BC an ngam lo a, Uruguay thlenga lo khel tawh ṭhin forward hian point 42 chu a score.
Sylver hian rebound 17 a la bawk a, mahse, a ṭhiante zingah point 15 score kai ve thei dang an awm lo a, mimal chet ṭhat hi Saron BC laka hnehna chan nan a tawk zo lo.
Saron tan an player chhuanvawr T. Lalhriatzela bawk langsarin, point 24 a score a, point 17 ngawt a score baka rebound 10 latu Abhishek Tyagi leh point 12 leh rebound 13 latu Frederick Elombi ten an pui ṭha bawk - point 17 score tu Ramdinfela Pachuau pawh lam hmaih atan chuan a uiawm.
Match li an khelha a vawi hnih nana chak Saron BC hi nizan khan Champhai BC nen an inkhel lehnghal a, an result kan hre hman lo. Zanin dar 8:30-ah Bungkawn LB-in Zarkawt BCA an hmachhawn dawn a, tun season-a a vawi khat nan chak an beisei ang.