CYMA Football-ah Nivia 'Shining Star'

CYMA leh MFA ṭangkawp buatsaih LBS Suzuki 22nd Inter Branch YMA Football Tournament-a ball hman tur an tichiang a, Nivia kut chhuak Shining Star hman a ni dawn. Shining Star hi tun hmain India rama football inelna sang ber National Football League-ah te hman a ni tawh ṭhin a, Mizoram Premier League-ah pawh hman a ni tawh.

MFA leh Nivia an thawhdun hnuah veng/khua inelnaah pawh Shining Star zel hman chhoh a ni. Mizoram Premier League-ah Nivia dominator hman ni tawh mah se Shining Star hi a man a tlawm zawk a, a tlo zawk avangin mi tin ban phakah a ngaih theih.

CYMA Football hi May 6, 2025 aṭanga khelh ṭan tur a ni. Entry Fee hi Rs. 1,000 a ni a, Central YMA Office emaw GPay hmangin 9774263515-ah April 25, 2025 ral hma thleng a pek theih. Inelna pet hawnna hi April 29, Thawhlehni zan dar 8:00 hian CYMA Hall-ah neih a ni ang.