Real Madrid-in Arnold an hnaih

Premier League champion hmabak Liverpool fan-ten chanchin lawmawm lo hriat tur an nei - an right back, an fachuam Trent Alexander-Arnold chuan season tawpah Real Madrid a zawm dawn.

Real hian Arnold hi kum hnih chhung an enthla tawh nia sawi a ni a, a ṭhian ṭha tak, Real midfielder Jude Bellingham chu Arnold-a'n Santiago Bernabeu a pan theih nan hian a thawhhlawk hle niin an sawi.

Liverpool khaw pa, an club academy chhuak ni bawk Arnold hi fans tam tak chuan an club captain la ni tura an beisei a ni a, an ngaihsan em em Steven Gerrard thlak zo ber tura an ngaih a ni.

Mahse, Liverpool tan match 349-a goal 22 khung a, assist vawi 87 neitu hian amah siam liantu hnungchhawnin, Real Madrid lam pan a thlang ta zawk.

Liverpool boss chhuak ta Jurgen Klopp kha Trent-a career-ah a pawimawh hle. October 2016 khan senior team tana a match hmasa ber a khelhtir a, a hawikir tawh lo.

2019-2020 inkara Premier League, Champions League leh FIFA Club World Cup-a Liverpool an champion theih nana thawhhlawk tak Arnold hian kum 2021 khan Anfield-ah contract thar a ziak a, kum li dang cham turin rinawmna thu a tiam.

Khatihlai khan Arnold hian, "Ka hmachhawpte hi zep ka tum hran lo a, he club captain nih hi ka thil tum ber a ni - chumi tur chuan ke kan pen mek a ni," a ti a, Reds captain nih chu a duhthusam a nih thu a sawi.

Liverpool fan-te pawhin hei hi an beiseina a ni a, mahse, tun hnaiah fans nen an inhmu thiam lo zeuh zeuh. October thla khan Arnold hian Liverpool tana Champions League nomawi chawi nawn ai chuan Ballon d'Or dawn a châk zawk thu a sawi a, fans tam takin team hlawhtlinna aia mimal hlawhtlinna ngai pawimawhah an puh.

Arnold hian Liverpool tan FA Cup, League, FA Community Shield leh UEFA Super Cup nomawi a chawi tawh bawk a, PFA Team of the Year-ah vawi thum ngawt lang tawhin, FIFA FIFPro World11 leh UEFA Team of the Year-ah vawi khat ve ve a lang bawk.

2019-20 season khan PFA Young Player of the Year leh Premier League Young Player of the Season-ah thlan a ni a, kum 26 mi lek ni chunga a sulhnu hi a ropui hle - Reds tan nomawi chawi theih zawng zawng a chawi tawh a, hei vang hian fans tam tak chuan chona thar hmachhawn duha Real pan a thlang hi an dem lo.

Liverpool chuan Arnold hi vawi tam an hnena cham turin an thlem tawh a, mahse, an hlawhchham vek. Khawthlang media ṭhenkhat chuan Real hian hlawh uchuak tak an pe dawn lo niin an sawi a, Reds-in pek an inhuam zat aiin a hniam niin an sawi hial!

Merseyside club-ah hian captain Virgil van Dijk leh goal khung khawl Mohamed Salah te chuan season tawp rualin an contract an hmang zo tawh dawn bawk a, he thu buatsaih a nih thleng hian contract thar an la ziak bik lo.