MN Enterprise Women's League: Vawiinah semifinal khelh a ni dawn

MN Enterprise MFA Women's League semifinal chu vawiin hian Lammualah khelh a ni dawn. Chawhma dar 9:30-ah Mizo Football News leh LM FC, Durtlang te an inkhel ang a, chhun dar 11:00-ah Kulikawn FC leh Springfield HSS te an inkhel zui ang.

Mizo Football News hi champion lai leh league-ah pakhatna an ni a, Mizo coach tawnhriat nei ṭha Lalsangzuala Hmar enkawl an ni. Mahse, vawiin hian captain Lalhruaizeli Khiangte (Nupuii) leh Lalthansangi te an chhawr thei dawn lo a, MFN hi an ṭhat theih dan berin an inlan dawn lo.

Thawhlehni khan Mizo Football News-in Sarah Lalṭhazovi goal hmangin LM FC, Durtlang 1-0 chauhin an hneh. Semifinal-ah goalkeeper Nupuii leh midfielder Thansangi te an awm dawn loh avangin LM FC tan semifinal kawng a inhawng. Semifinal hnuhnung zawkah Kulikawn FC leh Springfield HSS te an inkhel dawn a, group match tawp berah Springfield-in 3-2 in hnehna an chang.

Mahse, Kulikawn hi table-a pahnihna leh team ṭha zawk tura ngaih an ni a, semifinal-ah inkhel result a thlak thei ang. Lalrinmuani telna Kulikawnin Springfield HSS hi hneh let ngei an tum dawn a, amaherawhchu an intawn hnuhnun ber aṭanga thlir chuan a awlsam dawn lo tih chiang.