TT inelna lian an nei ṭan

Mizoram Table Tennis Association Tournament (MTTA) hnuaia inelna lian leh ngaihhlut ber - 39th Mizoram State Table Tennis Championship 2024 chu nimin aṭang khan Mizoram Table Tennis Hall, Mission Vengah khelh ṭan a ni.

Championship hi ni li chhung awh tur niin March 28, Zirtawpniah khelh zawh a ni ang. MTTA hian season kal laiah Mizoram pum huap inelna Ranking Table Tennis tournament hi ṭum thum lai a lo buatsaih tawh a, tun ṭuma inelna hi kum khata an tournament pui ber leh ranking point tamna ber a ni.

39th Mizoram State Table Tennis Championship-ah hian category hrang hrang 15-ah inelna neih a ni dawn a, heng inelnaa tel tur hian Mizoram hmun hrang hrang District Table Tennis Association panga aṭangin infiammi 217 an rawn tel a ni.