I League champion inum boruak a 'hot'

I League-ah match 22 khelh tur a ni a, match 20 khelh zawh a ni tawh - match hnih chiah khelh tur a la awm nachungin champion tur a la hriat loh. March 24, Thawhṭanni zan khan Inter Kashi-in an mualah Shillong Lajong 2-1 in an hneh a, hmahruaitu Churchill Brothers nen an point hmuh zat a inang chiah.

Edmund Lalrindika telna Inter Kashi leh Goan club Churchill Brothers te hi March 30, Pathianni hian Raia Panchayat Ground, Goa-ah an inkhel dawn a, final ang hiala chhal theih a ni. Goan club-ah hian Mizo player Lalbiakhlua, Lalremruata Ralte leh Lalliansanga Renthlei te an awm a, Aizawl FC che ṭha tawk lo mah se nomawi chawi tur zingah Mizo player an awm dawn tih erawh a chiang tawh thung.

Inter Kashi an chak

Kalyani Stadium-ah Inter Kashi-in bul an ṭan ṭha a, Mario Barco-a'n goal ban a pet per nghal. Mualneitu lam inkhel a nung ṭha a, Mizo tlangval Edmund pawh a hmuhnawm hle.

Lajong tlarhnungin ball an pet chhuak ṭha tawk lo a, box pawnah Nikola Stojanovic-a'n changin Serbian midfielder hian box chhunga a lakluh hnuah minute 33-naah goal hmahruai a khung.

Inter Kashi-in nawr chhunzawm zelin winger Bryce Miranda-a'n chance ṭha bik a hlah. Minute 39-naah Mario Barco-a'n foreign player danglamna a lantir a, Edmund-a ball pek chu kawh zetin a pet lut.

First half-ah Inter Kashi-in 2-0 in hma an hruai a, inkhel an thunun bawk. Second half-ah pawh goal chance an nei ṭha zel a, Edmund a vanneih ṭum a ni lo. Mualneituin goal an khung theih loh an tuar a, Lajong tan Batskhemlang Thangkhiew-a'n minute 78-naah kawh zetin box pawn aṭangin siphurh a sut ṭhen.

Lajong-in goal an khung tak avangin point hmu turin beiseina thar an nei a, mahse team ṭha zawk Inter-in goal chance ṭha an nei a, Mario Barco-a'n hnai tak aṭangin a pet over. Inter Kashi 2-1 in an chak.

Champion inchuhna

I League-ah hian head to head en a ni a, Churchill Brothers-in khualmualah Inter Kashi hi 3-1 a an hneh tawh bakah an goal difference a ṭhat avangin Antonio López hote aiin an dinhmun a ṭha zawk. Goan club tan draw ringawt pawh result ṭha a ni thei ang.

Chutihrualin sum hmang tam Inter Kashi-in season thara ISL khelh ngei an tum a, Raia Panchayat Ground-ah attacking football an khelh a rinawm avangin Goan club tan dan an harsa dawn. Tunah hian club pahnihin point 38 an hmu ve ve a, goal difference aia point a pawimawh zawk avangin Inter Kashi tan champion beiseina a la inhawng zau hle.

Churchill leh Inter Kashi bakah Real Kashmir leh Gokulam Kerala tan champion beiseina tlem a la awm a, anni pawh hi I League champion inchuhna tingaihnawmtu an ni thei bawk.

Relegation battle

I League aṭangin Delhi FC an tla tawh a, Dempo SC an him tawh. Team pahnih an relegate dawn avangin SC Bengaluru emaw Aizawl FC emaw an relegate dawn.

SC Bengaluru hian khualmualah Namdhari leh Sreenidi Deccan an la hmachhawn dawn a, Aizawl FC-in khualmuala Shillong Lajong an tlawh zawhah Namdhari an mikhual dawn.

Aizawl FC leh SC Bengaluru te hian an match tawp ber hi April 5, Inrinni zanah ve ve an khel dawn a, ngaihven a hlawh khawp ang. Chutiang bawkin champion inum Churchill leh Inter Kashi ten April 6, Pathianni zanah ve ve an khel bawk dawn.