Tlai dar 2:30-ah Neroca Vs Chanmari FC

25th March, 2025

I League 2-ah Chanmari FC-in vawiin tlai dar 2:30 hian Neroca an hmachhawn dawn a, Khuman Lampak Stadium-ah an inkhel dawn. Dipankur Sharma hote hi match hnuhnung berah United Sports Club nen an inhnehtawk a, an hnuai chiaha awm Sporting Clube de Goa nen an inthlauhna chu point li chauh a ni tawh.

Nimin tlai khan hmahruaitu Diamond Harbour chuan Khuman Lampak Stadium-ah Trau 2-0 in an hneh a, khelh zat inangah Kolkata club hi Mizo club aiin point liin an hmu tam zawk. I League 2-a a sang pahnih hi season thara I League khel turin an tling ang.

Khualmual fiahna

Chanmari FC-in March 1, Inrinnia Keinou Library & Sports Association 4-0 a an sawp hnu khan khualmualah hlir match an nei a, RG Stadium-a an result neih ṭhat ang an chhunzawm thei lo.

Mizo club hian a zawn zatin Diamond Harbour (2-0) leh Sporting Clube de Goa (1-0) te an hneh lo a, Khuman Lampak Stadium-ah Trau 1-0 in hneh mah se an match hnuhnung berah United Sports Club nen 1-1 in an inhnehtawk. Chanmari FC hian match hnuhnung palia point 12 hmuh theihna aṭangin point li chauh an hlawh chhuak a, pathumna Sporting Clube de Goa-in an hnaih ta hle.

Pressure a awm lo!

Chanmari coach Dipankur Sharma chuan, "Season ṭantirhah khan match 11 khelh zawhah pahnihnaah awmin pathumna nen point liin in inthlau ang, ti ta se. Keini chuan lawm takin kan pawm ang. Tuna kan dinhmun hi a ṭha a, pressure kan nei lo," tiin Vanglaini a hrilh.

Chanmariin match hnuhnung bera United Sports an hmachhawn ṭumin Lalthankima leh Lalhmangaihsanga (Papuia) te hnawhchhuah an ni a, tun ṭumah hian hrem vangin an inkhel thei lo. Captain Lalrinchhana Tochhawng kawppui turin Papuia aiah FC Lalhmunmawia a lut thei mai ang a, Thathana a inlan thei lo pawh ni se winger chhawr tur an la ṭhahnem.

Chutihrualin Neroca hi Manipur club pathum zinga ṭha ber an ni a, point an hmu sang ber bawk. RG Stadium-a an inkhelh ṭum pawh khan minute 73-naa Vincent Lalduhawma goal hmangin Mizo club-in hnehna an chang a, an chakna zat hi 1-0 chauh a ni. Imphal-a point thum hmuh hi a awlsam dawn lo.