Argentina tan World Cup a hnai ta

World champion Argentina chuan World Cup 2026 khel turin hmabak an ngah tawh lo - Nilaini zing dar 5:30 hian Brazil an mikhual dawn a, point khat lek an hmuh belh a nih pawhin football inelna lian khel turin an tling chiang tawh dawn a ni.

Inrinni zing inkhelah Lionel Scaloni naute hian winger Thiago Almada-a goal khat hmangin Uruguay chu 1-0 in an hneh, goal awmchhun hi Julian Alvarez siamsak a ni a, yard 25 zeta hla aṭangin Almada hian a khung.

Argentina tan hian captain Lionel Messi, Lautaro Martinez leh Paulo Dybala te inlan thei lo mah se an goal mamawh ang an khung tho - World champion ni hmasa ber Uruguay lamin a chhanletna tur an nei lo a ni.

La Albiceleste coach Lionel Scaloni chuan, "Player ṭhenkhat an inkhel thei lo a nih chuan midang tan hun ṭha a inhawng ve mai ṭhin. Kan result chauh hi ka lawmna chhan a ni lo, khelmual chhunga lutten chak duh em em maia an bei lai hmuh kha a nuam.

"Argentina jersey hatu an ni a, world champion an nihna kha a takin an lantir ṭhin a ni. Chu chuan min tilawm em em a, kan hmabak hlenchhuah tur kan neihah pawh ṭha lehzual zawkin kan khelh theih ka beisei," tiin a sawi.

Nikum November thla khan ram pahnihte hi Buenos Aires-ah an intawng a, mualneitu Argentina 2-0 in an chak lo - World Cup 2026 qualifier an khelh tawh china an chak loh awmchhun a ni hial, tunah erawh an hneh let leh ta chiah.

Argentina hian qualifier khelh hmabak match panga an la nei a, football inelna lian leh ngaihhlut hlawh bera inlan turin point khat chauh an mamawh tawh a, thil mak tak a thleng a nih ngawt loh chuan North America lamah inelna an hmachhawn ngei ang.