Indian Premier League an ṭan

Cricket inelnaa sum tamna ber Indian Premier League chu March 22, Inrinni zan khan khelh ṭan a ni a, Royal Challengers Bengaluru-in hnehna an chang nghal. Eden Gardens-ah Kolkata Knight Riders-in 174/8 runs chauh an siam a, RCB-in over 16.2 lekah 177/3 runs siamin wicket rukin hnehna an chang.

RCB tan Phil Salt (56) leh Virat Kohli (59*) ten bul an ṭan ṭha a, wicket hmasa ber an hloh hian 95 runs an siam tawh. A tawp thlengin Kohli a dam a, ball 36-ah 59 runs siamin ball 22 dah bangin target an umpha.

Zanin hian inelna hi chhunzawm a ni dawn a, zan dar 7:30-ah Delhi Capitals leh Lucknow Super Giants te an inkhel ang.

Inelna kalphung

IPL-ah hian team 10 an awm a, group A leh B-ah panga ve vein an ṭhen. Group A-ah Chennai Super Kings, Kolkata Knight Riders, Punjab Kings, Rajasthan Royals leh Royal Challengers Bengaluru te an awm. Group B-ah Delhi Capitals, Gujarat Titans, Lucknow Super Giants, Mumbai Indians leh Sunrisers Hyderabad te an awm thung.

Team 10-te hian league round-ah match 14 ṭheuh an khel a, an group-a awm team-te hi ṭum hnih ṭheuh (home & away) an hmachhawn. Group danga mi team pakhat bik chu ṭum hnih tho an hmachhawn a, team li dang chu vawi khat ṭheuh an hmachhawn bawk.

Vawi khat chakin point hnih a ni a, an khel zo thei lo a nih chuan point khat ve ve an hmu ang. Team te hi an inhnehtawk a nih chuan Super Over hmangin chak zawk an zawng ang.

Engtin zel?

Inelna hi March 22, Inrinni aṭang khan khelh ṭan a ni a, group stage hi hi May 18, 2025 thleng an khel dawn. Knockout hi qualifier 1, eliminator, qualifier 2 leh final-ah ṭhen a ni.

May 20, 2025-ah league round-a pakhatna leh pahnihnain qualifier 1 an khel ang a, a chak zawkin final an lut nghal ang. A chak lo zawk pawhin qualifier 2 hmangin final luh theih dan a awm.

Eliminator hi May 21, 2025-ah khelh a ni ang a, pathumna leh palina te an inkhel dawn. Qualifier 1 leh Eliminator hi Rajiv Gandhi International Cricket Stadium, Hyderabad-ah khelh a ni ang.

Qualifier 2 leh final hi Eden Gardens, Kolkata-ah khelh a ni dawn. Qualifier 2 hi May 23, 2025-a khelh tur a ni a, eliminator-a chak leh qualifier 1-a a chak lo an inkhel ang. Heta chak hian final an lut ang a, qualifier 1-a chak zawk nen nomawi an inchuh ang.