World Cup atana tling hmasa ber Japan

Football inelna ngaihhlut leh boruak nei lian ber FIFA World Cup 2026 khel turin Japan an in pet tling. Inelna thlengtu hi an tling sa ṭhin, ram dang zawngin qualifying an khelh a ngai, qualifier khel zingah Japan hi an tling hmasa ber a ni.

Ningani zan khan Japan hian Saitama Stadium-ah Bahrain an lo mikhual a, second half-ah Daichi Kamada leh Takefusa Kubo ten goal an khung a, match sarih an khelh aṭanga point 19 hmuin midang tan umphak theih an ni tawh lo.

Samurai Blue hian a zawna a vawi riat nan World Cup an khel dawn a, match hmabak la nei mah se group C-ah pahnihna aia hniam an ni thei tawh lo, hadam takin an hmabakah an awm thei tawh tihna a ni.

Asia khawmualpui ramte chu group pathumah ṭhenhran an ni a, a sang pahnih te chu World Cup khel turin an tling zel dawn a ni.