April-ah Indian Super Cup khelh a ni dawn

Indian football-a top division league Indian Super League club te leh second division inelna I League club te inelna, Super Cup chu April 21 aṭangin khelh ṭan a ni dawn.

Super Cup hi hmun khatah khelh tur niin, Bhubaneswar, Odisha chuan inelna hi a thleng dawn. Super Cup hi knockout tournament niin, club 16 inelna tur a ni a, a hmuhnawm leh dawn.

Indian Super League club 13-te chuan he inelna hi an hmachhawn vek dawn a, anni bakah hian I League club pathumte chuan inelna hi an hmachhawn dawn - I League club pathum hi I League table-a a sang pathum an ni ang.

Super Cup hi vawi nga neih a nihna tur a ni a, he inelnaa champion hian AFC Champions League 2 playoff an khel ang - he inelna hi Europe-ah chuan Europa League tlukpui a ni a, Asian football-a club inelna sang ber dawttu tihna a ni.

Kum 2018 khan Super Cup hi khelh ṭan niin, Bengaluru FC chu he inelnaa champion hmasa ber an ni a, kum 2019 khan FC Goa an champion. Covid-19 avangin 2020-2022 inkar khan inelna hi kalpui a ni lo a, 2023-a khelh a nih leh khan Odisha FC an champion.

Season hmasa khan East Bengal chuan final-ah champion lai Odisha chu 3-2 in an hneh a, Kalinga Stadium, Bhubaneswar-a inkhel hmuhnawm takah final hi minute 120 an khel hial - a tawpah Kolkata club an chungnung a, an champion.

Super Cup 2024 hi Mizote tan tournament chhinchhiahtlak tak a ni tel. Odisha forward Isak Vanlalruatfela chu Best Player atan thlan a ni a, khatihlaia Odisha goalkeeper Lalthuammawia Ralte chu Best Keeper atan thlan a ni bawk.

Season hmasa champion East Bengal-in champion lawmmanah AFC Champions League 2 playoff an khel a, mahse, Turkmenistan club FC Altyn Asyr chu 3-2 a hneh loin an inpetkai zo lo.

Kolkata club hi Asia khawmualpuia club inelna san lama pathumna, AFC Challenge League (Europa Conference League tlukpui) lamah an inlan zui a, quarterfinal an inpetkai.

AFC Challenge league-ah hian group khatah Bangladesh club Bashundara Kings, Lebanon club Nejmeh leh Bhutan club Paro te nen awm awm ho a, hmun khatah group stage hi khelh niin, Bhutan khawpui Thimphu chuan an group hi an thleng.

Vawi khat ṭheuh an inkhelh kual hnuah a sang ber chu quarterfinal khel turin an tling. Mahse, quarterfinal lut tura Bashundara Kings (4-0) leh Nejmeh (3-2) hneh a, inelna thlengtu Paro (2-2) in draw puitu East Bengal hian quarterfinal-ah Turkmenistan club bawk an ngam lo.

Quarterfinal hi double leg-a khelh niin, FK Arkadag chu Kolkata-ah 1-0 a hneh loin, khualmualah 2-1 in an hneh lo bawk a, inkhel pahnih belhkhawmah 3-1 a tlawmin an tla.