Germany-in Italy-ah hnehna an chang

San Siro-ah Italy-in Sandro Tonali hmangin Germany lakah khung hmasa mah se mikhual team-in Tim Kleindienst leh Leon Goretzka hmangin an chhanglet. Second leg hi Pathianni zan hian Signal Iduna Park-ah khelh a ni ang.

Italy-in mawi zetin minute riatna lekah Germany tlarhnung an ṭhiat a, Nicolo Barella ball pek luh chu Matteo Politano-a'n um lutin a cross ṭha chu Tonali-a'n goal-ah a khung. Mualneitu an nung ṭha a, mah se Manuel Neuer inhliam vanga bul ṭan Oliver Baumann a che ṭha a, Germany-in goal an chhuah belh lo.

Second half ṭan chiahah Borussia Monchengladbach striker Kleindienst a rawn lut a, minute 49-naah Joshua Kimmich-a ball vawrhluh chu a tauh lut. Italy hmuhnawm zui mah se goal ber an khung thei lo. Minute 76-naah Kimmich-a corner pet ṭha chu Goretzka-a'n tauh fuh zeuhin goal-ah a lut a, Germany-in hnehna an chang.

Julian Nagelsmann-a'n goal veng turin Alexander Nubel aiah Oliver Baumann a thlang a, sawisel hlawh deuh mah se thutlukna dik a siam tih San Siro-ah a lang.