Spain chhantu Merino

Spain-in De Kuip, Rotterdam-ah Netherlands a tlawh a, 2-2 in inkhel a tawp. La Roja tan Arsenal midfielder Mikel Merino chuan injury time-ah siphurh sutna goal a khung. Inkhela chak zawk hian semifinal-ah Croatia leh France inkhela chak zawk a hmachhawn dawn.

Euro C'ship champion lai Spain-in mikhualna hmunah bul an ṭha a, Lamine Yamal-a'n Jorrel Hato ball chhuhsakin Barcelona star hian Pedri pein, ani hian Nico Williams pe lehin Athletic Bilbao forward hian minute kuanah goal hmahruai a khung.

Oranje an tho chhuak har lo a, minute 28-naah Cody Gakpo chuan kawh zetin siphurh a sut. Second half ṭan chiahah Jeremie Frimpong ball pek chu Tijjani Reijnders-a'n a khung a, Netherlands-in 2-1 in hma hruai an ta zawk.

Mualneitu tan chak theihna remchang awm mah se, defender pawimawh Hato chu minute 81-naah hnawhchhuah a ni. Injury time-ah Spain-in an tamna an hmang ṭangkai a, Nico Williams ball pet chu keeper Bart Verbruggen-a'n tiperin substitute Merino-a'n siphurh sutna goal a khung. Second leg engkim chinfel a ni dawn a, Mestalla Stadium, Valencia-ah khelh a ni ang.